E siman aki, Colegio di Supervision Financiero (CAft) a publica su conseho tocante di e di dos modificacion di proyecto presupuestario y Nota di Herfst 2024.

Den su carta dirigi na minister di Finanzas, Xiomara Maduro, presidente di CAft, Lidewijde Ongering a indica cu CAft a ricibi e dos modificacion di proyecto presupuestario (OBW) y Nota di Herfst di Aruba na tempo, y cu e carta en cuestion, ta duna minister Maduro e conseho di CAft tocante e OBW aki.

Segun CAft, e OBW ta mustra un imagen positivo cu un surplus di financiamento di e sector colectivo di Afl. 194 miyon. Esaki ta significa cu Aruba ta cumpli cu e norma pa e saldo di financiamento stipula den e Ordenanza Nacional di supervision financiero temporal di Aruba (Landsverordening Aruba tijdelijk financieel toezicht – LAft).

Aruba ta presupuesta un resultado positivo inespera riba e presupuesto di pais di Afl. 98 miyon, y ta distribui esaki uniformemente entre amortisacionnan y inversionnan conforme e normanan presupuestario. Esaki ta contribui na e mehoracion di e posicion di debe di e pais y ta crea espacio adicional pa inversionnan. Aruba lo por amortisa mas, empleando tambe e resultadonan positivo inespera di e sector colectivo pa amortisacion di debe, conforme e LAft. Haciendo esey, Aruba tin menos necesidad di fia, y por evita mas aumento di e gastonan di interes, cu ya caba ta ascende te 18 porciento di e presupuesto.

E OBW ainda no ta cumpli cu tur e normanan stipula den e LAft. P’esey, tocante e prome modificacion presupuestario stipula (prome BW), CAft a haci varios recomendacion cu e peticion pa incorpora esakinan den e OBW. Aruba a incorpora parti di e recomendacionnan aki den e OBW.

Normanan presupuestario
Resultadonan positivo inespera

Pa 2024, e OBW ta presenta un surplus di financiamento di Afl. 194 miyon; 2,7 porciento di e producto nacional bruto (GDP). Asina Aruba ta cumpli ampliamente cu e norma presupuestario di e saldo di financiamento di e sector colectivo di como minimo 1 porciento di e GDP.

Di e surplus di financiamento ta presupuesta 1,7 porciento di e GDP cerca e pais, y 1 porciento cerca e sobra entidadnan di e sector colectivo. E resultado positivo inespera cerca pais ta Afl. 98 miyon. Di e resultado positivo aki, ta emplea Afl. 49 miyon pa inversionnan adicional, y Afl. 49 miyon pa amortisacionnan. E resultado positivo inespera pa henter e sector colectivo ta ascende te Afl. 145 miyon.

Banda di e resultadonan positivo inespera cerca pais, tambe tin resultadonan positivo inespera cerca e sobra entidadnan di e sector colectivo (Afl. 47 miyon). Por atribui esaki na un surplus mas alto di loke a anticipa cerca Algemene Ziekteverzekering (AZV) y Aruba Tourism Authority (ATA).

E LAft ta stipula cu e surplus presupuesta y mita di e resultadonan positivo inespera cerca e sobra entidadnan di e sector colectivo mester keda emplea pa amortisacion di debe. Esaki no ta sucede actualmente.

Na 2024, ta amortisa Afl. 568 miyon, di loke ta financia Afl. 120 miyon cu recursonan propio. Si ta emplea e surplus di e sector colectivo pa amortisacion di debe, tumando na cuenta e deber di reserva di e fondonan social, na 2024 Aruba por amortisa mas cu recursonan propio, y asina limita e necesidad pa refinancia na 2024.

Maneho nobo/intensificacion

Den e OBW ta cubri parti di intensificacion den e marco di gastonan, pero tin Afl. 5 miyon cu no ta cubri conforme e reglanan presupuestario stipula den e LAft.

Anteriormente, CAft a conseha pa aplica e reglanan presupuestario corectamente y pa cubri e gastonan aumenta empleando subagotamento structural of implementando realocacionnan den otro partida na e banda di gastonan di e presupuesto. Pa motibo cu ainda no a ricibi e di dos informe di implementacion, CAft por lo pronto no tin bista riba posibel subagotamento cu lo por emplea pa cubri e intensificacion.

Sinembargo, a base di e patronchi historico di subagotamento riba presupuestonan, CAft ta anticipa cu lo ta alcansabel pa logra cobertura pa esaki.

CAft ta enfatisa e importancia di aclara e cifranan mas reciente di realisacion di e gastonan, y ta pidi gobierno pa aplica e reglanan presupuestario conforme e LAft. Debe E ratio di debe ta mustra un tendencia di bahada. Di e manera aki, e meta di realisa un ratio di debe di 70 porciento di e GDP na 2027 ta bira alcansabel. Esaki ta un desaroyo positivo.

Den e OBW, solamente ta presenta e desaroyo di e debe di e pais, mientras e definicion di debe segun e LAft ta inclui e sector colectivo. P’esey, ya caba CAft a pidi Aruba pa presenta e desaroyo di debe di e sector colectivo den e OBW. E informacion aki ainda no a ser inclui. CAft ta urgi Aruba pa aclara e desaroyo di debe di e sector colectivo mas pronto posibel.

Reduccion di debe ta keda crucial, principalmente den e contexto di e tarea di refinanciacion di Afl. 3 biyon cu te 2029 por causa presion adicional.

Gastonan di personal

CAft a pidi Aruba repetidamente pa inclui e desaroyo di e gastonan di personal conforme e definicion di e LAft den e OBW. E montante di Afl. 481 miyon cu a ser inclui den e OBW ta solamente e gastonan di personal di pais. Debi na esaki, e OWB no ta cumpli cu e norma di gastonan di personal stipula den e LAft.

Awor, a palabra cu Aruba cu lo inclui e informacion aki den e di dos informe di implementacion. Ta importante pa CAft haya un bista completo di e gastonan di personal total. Esaki ta importante sobretodo awor cu a aumenta e salarionan tanto di trahadornan di gobierno como di personal di enseñanza.

Pasonan siguiente

Den su conseho tocante di e prome BW7 , CAft a haci varios recomendacion. A duna siguimento na parti di nan. Asina Aruba a indica cu lo involucra e documentacion necesario tocante di e gastonan di personal den e di dos informe di implementacion di 2024.

Banda di esey, e pais ta deliberando cu varios entidad den e sector colectivo pa calcula e debe total.

Tocante di e sobra recomendacionnan, CAft ta pidi gobierno pa implementa esakinan den e OBW prome cu ta ofrece esaki na Parlamento.
1. Utilisa e resultadonan positivo inespera cerca pais y cerca sobra entidadnan di sector colectivo pa amortisacion y inversion adicional.
2. Aplica e reglanan presupuestario conforme e LAft corectamente y percura cu e gastonan aumenta ta keda cubri pa medio di empleo di subagotamento structural of pa medio di realocacionnan den otro partida na e banda di gastonan di presupuesto.
3. Yega na palabracionnan cu e sobra entidadnan di e sector colectivo, conforme e LAft, pa asina e surplusnan cerca e entidadnan aki tambe por keda utilisa pa amortisacion di debe.