Tur dia cantidad desperdicio biologico, organico y medicinal ta wordo produci den hospital, centro di salud, consultorio medico y odontologico, laboratorionan clinico, cas di cuido. Pero… tin un maneho adecua pa nan?… E maneho ta wordo ehecuta?… Unda ta bay para tur e cantidad di desperdicionan aki?… Y kende ta e responsabel final di nan?

Ex minister Otmar Oduber a yega di lanta un comision hunto cu su colega di Salubridad Publico, pa bin cu un maneho integral riba desperdicio of waste management. Den e comision aki Dr. Wilmer Salazar encarga cu e parti medico, hunto cu Sr. Anselmo Mathew di DVG y Sra. Escobar riba aspecto huridico y Yvette Geerman di departamento di Higuiena, a wordo apunta dor di minister di Salubridad Publico, Dangui Oduber, pa atende specificamente cu loke ta trata e maneho di desperdicio medicinal.

Maneho

Dr. Salazar a bisa cu e maneho riba su mes no tabata algo nobo. Pero si nan a logra introduci un parti importante riba con nos ta deal cu e produccion di desperdicio medico cu ta wordo produci pa diferente localidad.

E meta di esaki tabata pa delinea e miho structura pa por hiba un maneho responsabel pa e tipo di desperdicio aki. E maneho aki ta inclui for di cu e desperdicio ta wordo produci te ora cu e companianan (EcoTech y Serlimar) ta recoge e sorto di desperdicio of sushi aki pa su destruccion final.

E maneho aki a keda traha dor di e subcomision encarga cu e tarea specifico aki, y el a keda entrega na e grupo multidisciplinario cu tabata inclui entre otro DOW y Directie Natuur En Milieu.

 

E aspecto ideal den henter asunto di desperdicio ta pa produci menos sushi posibel. Pero semper nos ta keda produci y logicamente mester busca un manera pa baha e produccion di desperdicio. Of busca alternativa por ehempel di recicla nan. Of busca un maneho cu no ta afecta ni medio ambiente ni naturalesa, y menos ainda ser humano.

Dr. Salazar a indica cu pa loke ta trata desecho medico por lo general e por ta infeccioso. Tambe e por ta toxico y kimico, entre otro. E ta demanda un maneho cuidadoso di e instancia of compania cu ta brinda e servicio pa recoge e tipo di material aki. Esunnan cu ta transporte te e sitio unda nan ta deshaci di dje. “Tur e pasonan aki a wordo traha y poni” el a bisa. E maneho aki ta busca pa evita cu e persona cu ta traha directamente cu e material infeccioso of toxico lo por resulta contamina of nan por haya consecuencia pa nan salud.

Tambe pa evita cualkier contaminacion pa e hendenan cu ta rond di dje. Igualmente pa e trahadonan cu ta recoge e sushi den e truck y transporte den e area cu nan ta deshaci di dje. E delaster tin di haci cu e instancia cu ta atende pa deshaci e sushi. Pero tambe e aspecto di medio ambiente y salud humano. Tur esaki a wordo poni den un documento cu a keda aproba dor di DVG.

Control y supervision

Nan a yega di realisa un encuesta entre luna di februari y april ultimo cu e parti di laboratorio clinico pa wak con nan capacidad tabata ta.

Tambe nan a bishita hospital y ImSan cu ta e instancianan mas grandi pa colecta informacion. Nan ta wak -segun Dr. Salazar- cu e companianan cu ta piki sushi, sea priva of di gobierno, nan ta implementa cierto maneho. Nan tin bakinan y/of container special y identifica pa benta tur material di desecho produci den e localidadnan aki.

Pero ken ta hiba e control of supervision pa e maneho aki ta wordo cumpli cabalmente. Un parti di e tarea aki ta cay riba Inspectie Volksgezondheid Aruba (IVA) cu ta esun cu ta controla e laboratorionan, entre otro dunadonan di servicio di salud.

Pero nan responsabilidad ta yega riba e parti cu e laboratorionan ta deshaci di nan material den e container di biohazard pa e compania cu nan tin contrata, bin buske y bay cune. Cada laboratorio tin nan maneho interno riba desperdicio. Un regla di nan ta cu tur material di desperdicio mester ta uno no activo, prome cu nan ta wordo benta den saco special den e container di biohazard.

Algun compania cu ta brinda e servicio ta stipula cu nan tin procedemento di maneho di desperdicio medico. Entre nan e container di biohazard mester ta di color cora, resistente y nan no ta leak niun substancia. Solamente e trucknan cu ta carga frontal ta permiti pa recoge e container/bakinan aki. Nan ta truck cu a wordo destina exclusivamente pa brinda e servicio aki. Tambe nan tin un ruta separa pa deshaci di e desecho medico aki. E truck ta transporta e desecho aki te hasta e dump di Parkietenbos, unda supuestamente nan ta wordo incinera.

Un aspecto clave cu ta keda colga den henter maneho riba desperdicio biologico of medicinal ta: ken ta controla y monitor e companianan cu ta brinda e servicio aki? Nan ta cumpliendo si of no?

Dr. Salazar ta haya cu IVA no solamente ta inspecciona e sistema medico, pero como instancia di gobierno, nan ta inspecciona tur loke tin di haber cu e parti aki. Pero den caso cu eventualmente ta sosode algo, nan por actua hunto cu DVG. Ya den pasado a yega di sosode un caso caminda un baki cu cantidad di hangua uza a cay riba caya, caminda DVG a atende e situacion aki hunto cu IVA. Pero tambe tin otro instancia manera Directie Natuur en Milieu, cu tin su rol den henter asunto aki riba tereno di control di medio ambiente.

 

Dr. Salazar a indica cu den e parti maneho ta aparece con e companianan tin cu deshaci di tur e material aki. E companianan mester tin cierto condicionnan y maneho. Sinembargo e ta reconoce cu mester tin un trabao di monitor mas frecuente pa wak con e sistema ta canando, specialmente den e fase final.

Alternativa

Tin diferente alternativa pa deshaci cu e desperdicio aki, entre nan e parti di ‘segrega,’ kiermen esun cu ta produci e desperdicio aki mester ta responsabel di dje. Manera antes por ehempel hospital tabatin su propio incinerator. Otro alternativa ta recicla. E hecho aki ta haci cu e compania encarga cu e fase final, mester genera un contaminacion minimo posibel den nos sistema, kiermen medio ambiente y salud.

Pa loke ta desperdicionan cu ta wordo cualifica como material infeccioso locual ta sterilisa nan pa medio di autoclave haciendo uzo di temperatura halto. Otro forma pa deshaci di material medico ta dera nan. Pero mas tanto material farmaceutico y toxico. Tambe material kimico cu no por neutralisa of cu nan no sa nan origen. E deramento aki ta demanda henter un procedura, ora cu nan ta dere e no por leak. E otro forma pa deshaci di nan ta incinera e material aki.

Un forma pa incinera ta esun habri, caminda ta wordo traha un buraco unda ta wordo buta tur e material medico pa kima nan cu combustibel. Pero e ta uno contaminado, ya cu e ta produci hopi huma di tur e material toxico, y e por causa problema den ambiente y bisindario. E otro parti di kima tin di haci cu uzo di incinerator. Esaki tabata e intencion ora cu a bini cu e incinerator chikito. Dr. Salazar a señala cu di tur e formanan di deshaci di e tipo di desperdicio aki, esun menos mal ta e incinerator.

E mester ta un incinerator cu ta cumpli cu tur norma pa evita menos contaminacion posibel stipula pa e tipo di ekipo aki. Esaki ta nifica menos risico pa medio ambiente y comunidad. Pero e mester tin personal capacita pa traha cune y tambe un control stricto.

Otro factor cu mester tene cuenta cune ta e localidad y biento. Vooral na Aruba cu ta un isla chikito y cu hopi biento. El a bisa cu diferente na e dump, nos tin un Sanitary landfill na Ser’i Thijshi cu ta un area cu lo por ta ideal. Pero si bo sa con pa maneha e asunto aki di incinerator adecuadamente.