Durante e prome fase di nan programa di ayudo humanitario, Cruz Cora a entrega 4500 famia e-vouchers. Aparte di e-Vouchers, nan a reparti mas cu 51 mil cuminda cayente pa personanan cu no por cushina.

E criterio uza pa otorga e tipo di ayudo aki, basicamente ta e mesun pa ambos. E ayudo aki oficialmente lo sigui te cu december awor.

Control

Cruz Cora tin principionan fundamental mundialmente conoci di etica pa brinda su ayudo humanitario. Hefe di Operacion, Marketing y Evento di Cruz Cora, Indra Anthony-Pereira a informa cu recientemente nan a habri pa nan di tres proceso di registracion y nan a haya un avalancha di 6 mil peticion nobo.

Nan tur ta wordo evalua. Pero e ta un proceso cu ta tuma su tempo, ya cu cada persona cu a haci un peticion ta wordo yama, y su caso ta wordo papia. Despues ta bin un proceso di verificacion pa asina nan por haya asistencia cu e-Voucher.

E ta haya cu a pesar di tur rekisito y control tin hende cu ta purba pasa nan un fast ball na Cruz Cora. E ta algo cu a yega di pasa caba. Tin hende mal intencional cu ta pasa tur caminda cu nan por pa pidi e mesun ayudo. “Imagina bo si nos no tin comunicacion cu e otro organisacionnan cu ta yuda,” el a bisa.

El a reitera cu nan ta purba di tin control mas cu ta posibel. Pero tin caso di hendenan cu ta purba saca mas probecho di e ayudo humanitario cu nan ta ofrece sin mester. “Esey ta duel nos. Pa nos ta fastioso pasobra nos kier yuda esunnan cu di berdad mas mester di dje. Pero tin hende cu ta haci mal uzo di esey, y nos tambe ta vulnerabel pa esey,” el a expresa. El a agrega cu nan ta purba mas posibel pa tene e situacion bao control den tur circunstancia.

Hopi biaha e manera cu Cruz Cora ta haya sa di e tipo di caso aki ta via comentario haci via social media. Pero nan no ta haya un denuncia formal. Tur cos cu tin di haber cu ayudo, keho, peticion, etc… bo por manda libremente un e-mail pa nan na: info@redcrossaruba.com.

Tambe nan tin un hot-line pa Covid: 582-2219. Cualkier keho cu ta drenta ta wordo canalisa cerca e departamento concerni. E ta keda den man di e departamento aki, kico nan ta dicidi di haci rond di e situacion cu a wordo denuncia.

Sinembargo como organisacion humanitario, nan ta haya dificil pa bin cu algun sorto di sancion contra e persona cu ta obra di mala fe. Esaki independiente cu nan por tin un prueba di berdad cu ta demostra e mal accion aki pa asina nan sa e proximo biaha cu e persona ta solicita e tipo di ayudo aki. Den un caso asina nan ta haci un sondeo mas intensivo y mas profundo, logicamente mas estricto, pero dificilmente nan no por bisa no di biaha.

“Pasobra nos ta un organisacion humanitario. Aunke awe bo ta tuma nos haci, no ta kita cu por ta mañan di berdad bo mester di dje. Nos t’ey pa yuda…” Anthony-Pereira a bisa

 

Vulnerabel

Cruz Cora ta yuda esun mas vulnerabel sin distincion di rasa, religion of nacionalidad. Pa Cruz Cora no ta haci niun diferencia ken a pidi e ayudo. Tin criterionan of puntonan cu nan mester tene na cuenta na momento di evalua kendenan ta esun mas vulnerabel pa ricibi ayudo humanitario.

Esun mas vulnerabel ta esun cu actualmente no tin niun sorto di entrada, ya sea di salario of subsidio di salario. Tampoco pension y menos asistencia di departamento di Asunto Social, ya sea FASE, onderstand y/of bijstad. Riba aspecto humano nan prioridad ta: personanan na estado, menor di edad, persona di edad y persona cu limitacion.

Anthony-Pereira a trece como ehempel gewoon un persona cu den Covid a perde su entrada. E tin un persona di edad cu ta biba den su cas cu ta depende di dje. E tin un yiu menor di edad cu ta depende di dje, y no tin entrada of ayudo for di otro instancia. E ta un persona vulnerabel cu por clasifica pa e asistencia cu Cruz Cora ta duna como ayudo humanitario.

El a declara na Bon Dia Aruba cu cada persona cu a haci un peticion ta wordo yama, y nan caso ta wordo papia y evalua door di un team cu ta discuti cada caso. “E no ta depende di un hende,” el a bisa.

 

Sistema “Red Rose”

E-Voucher ta funciona manera un debit card di Cruz Cora pa medio di un sistema cu nan ta yama “Red Rose.” E por wordo uza den cinco supermercado local pa cumpra cuminda y productonan di higiena personal y cas.

“Red Rose” ta un programa mundial di e-Voucher pa ayudo humanitario. El a bisa cu hopi pais y Cruz Cora en general ta haci uzo di e sistema aki. E ta demanda full un sistema di administracion cu nan ta hay’e full pa implementa, caminda bo por administra delaster un cos.

Pa medio di e-Voucher cu ta keda un propiedad di Cruz Cora Aruba, nan tin full informacion hinca den nan sistema ora bo ta haci uzo di dje. E recibo di compra aki ta drenta automaticamente cerca Cruz Cora su sistema. Eynan nan por wak tambe con e uzo ta di e carchi aki. Pasobra bo no meter uza e carchi den un biaha, pasobra e ta traha manera un debit card.

E voucher no por wordo uza pa cumpra alcohol of producto di tabaco. El a bisa cu esey ta tur caminda skirbi y e supermercado no ta permiti tampoco. “Di un hende yega na caha e idea ta cu lo bisa: sorry e producto aki no ta cay bao e programa.”

Tambe e supermercado por pidi bo un ID pa verifica si bo ta e titular di e e-voucher otorga. Anthony-Pereira a splica na Bon Dia Aruba cu e e-Voucher ta funciona manera un carchi di banco, kiermen cu na momento cu nan ta scanner na caha nan por pidi bo un ID.

Aworaki e-Voucher por wordo uza den: Super Food, Save More Boegoeroei y San Nicolas, Do-It Super Center, Cheng’s Supermarket y Johnsons’s Supermarket. E hecho cu tin cinco supermercado specifico den e programa di ayudo humanitario aki ta pasobra “nan a acepta pa yuda cu e programa,” el a bisa. Nan tin un scanner apart cu ta conecta na e sistema di Red Rose. Esaki no kiermen cu nan ta haya un prijs preferencial.

E suma di e-Voucher ta depende di e tamaño di e famia. E ta entre 358 florin pa 950 florin destina pa cubri cuminda y productonan di higiena pa 1 luna. Nan ta evalua despues si e persona of famia mester ainda di e sorto di ayudo humanitario aki.

E ayudo aki ta bira realidad danki na e ayudo financiero cu Minister di Asunto Interior y Asunto di Reino di Hulanda. Den e prome fase Cruz Cora Aruba a ricibi e cifra di 10 miyon florin for di nan. Anthony-Pereira a indica na Bon Dia Aruba cu sin duda e ayudo di Hulanda ta grandi. No solamente pa maneha e programa aki hunto cu e demas islanan di nos region, pero tambe cu apoyo di personal.