Bon Dia Aruba a combersa cu Team PitFit cu ta cla pa biaha mayan pa Tampa pa competencia di Bodybuilding WBFF cu lo tuma luga fin di e siman aki. Deporte di Bodybuilding aki na Aruba no ta haya hopi reconocemento y atencion di organisacionnan compara cu afo, pero esunnan cu ta den e deporte realmente ta dedica henter nan bida na esaki.
Elrick Maldonado Coach di team PitFit ta conta Bon Dia Aruba di e preparacionnan. El a splica cu a cuminsa cu preparacionnan pa bay Tampa na januari, un decision cu a wordo tuma na ulitmo ora pa bay competi, pues a scoge Tampa cu ta esun di mas cerca. E team ta viaha dia 20, pero e competencia mes ta dia 23.
Participantenan
“Esunnan cu ta bay competi e fin di siman aki ta Jerwin Giel cu ta bay competi den e categoria di “Tranformation” cual ta un categoria cu ta enfoca riba con un hende su curpa tabata prome, y con e ta actualmente, pues nan ta wak kico e atleta a logra. E categori ta hopi amplio y tin hopi participante cu transformacion di cambio di peso drastico.” Sinembargo locual cu ta haci cu Jerwin Giel ta destaca ta e storia unico cu e tin di “Cancer Survival” y tur locual cu el a pasa aden te pa trasforma su curpa aworaki den fitness. Segun e coach ta splica p’esey esaki ta e categoria cu pas mas cun’e. Johnatan Leon ta bay den e categoria di Fitness Model, cual ta e categoria cu ta encera guynan mas fit (duro) cu tin, e tin experiencia den esaki caba, como cu aña pasa el a competi caba. Pa Jerwin Giel si esaki lo ta su prome biaha compitiendo y e lo debuta den exterior.
Jerwin Giel
“Ora cu mi coach a acerca mi cu e reto aki mi a dicidi di acepta esaki como cu mi ta un hende cu ta gusta reto nobo, futbol no tabata pami pas pues mi a cuminsa cu esaki. Esaki ta algo pami, semper mi tabata kier e body, pero mi no tabata sa kico pa haci pa mi yega na dje. Anto tur hende tin miedo pa yega gym y bo no sa kico pa haci. E ta un challenge, mi ta cla pe, mi ta sinti cu mi ta bay gana.”
Jonathan Leong
Preparacionnan ta bayendo bon segun Jonathan, kende ta splica cu e preparacionnan ta bayendo bon, semper tin e partinan duro y e partinan mas facil. “Compara cu aña pasa mi a wak un diferencia grandi den mi curpa, y mi por bisa cu mi ta cla pe.”
Bodybuilding deporte discrimina
A puntra e Coach con e ta haya cu Aruba ta mira e deporte di Bodybuilding pa cual el a bisa cu e ta opina cu e deporte di Bodybuilding ta wordo discrimina hopi na Aruba. Pasobra con cu bay con cu bin, un gym ta e base primordial di tur deporte. “No mather cua deporte, sea ta landamento, coremento of baseball, tur ta yega un gym un dia, pero pa loke ta bodybuilding mes, no ta wordo mesun bon carga cu otro deportenan cual ta di lamenta, pasobra e atletanan ta sacrfica hopi cos, hinca hopi tempo y placa, anto pa e no wordo carga door di Aruba. Cual cu dios su poder lo drecha si, e coach a bisa.”
Terrance Ras
“Semper mi a train, e ta un estilo di bida cu mi hinca mi mes den dje, esaki ta e di dos biaha cu mi ta bya competi den e competencia di Bodybuilding aki na Aruba cual lo tuma luga na September. Aña pasa mi tabata cu Team Hemradj, e aña aki mi ta cu team PitFit. Pa ta den e team e ta haci e deporte mas great, ta train hunto y ta yuda otro manera mester ta. E reto di mas grandi cu tin preparando pa e competencia ta e comemento, pero claro cu no ta un reto tin, pasobra bo ta hinca bo famia tambe aden. E training ta duro (2 biaha pa dia), pero e comemento ta esencial tambe pa bo por baha y yega unda cu bo mester ta.”
J. Kock
“Esaki ta algo nobo pami, semper mi a guste pasobra mi tabatin famia den e deporte, pero nunca mi a haya e oportunidad manera cu mi a haya aworaki, di sa kico mi ta haciendo y pakico mi ta hacie. E ta algo hopi great y mi ta encursha tur hende cu un dia haya e oportunidad, pa tume. Mi ta gradici mi señora cu ta esun cu ta yuda mi na cas y cu e guynan den mi team na mi banda nos ta bay pe.”
Tip:
Diariamente ta wordo recomenda pa haci actividad fisico por lo menos 30 minuut pa dia, of 10 mil stap pa dia. Movecion ta bay man den man cu comemento saludabel y ta esencial pa e bon funcionamento di nos organonan.
