Recientemente na nos mesa di redaccion a drenta informacion tocante un situacion cu ta involucra e actividad di core cabay (horseback riding) riba beach, cual ta prohibi pa ley. Segun e informacion, tin un operador di tour na Aruba cu publicamente ta haci propaganda pa e actividad aki y tin hasta potretnan di personanan riba cabay ta core riba beach.

Un persona anonimo a reporta, mediante un mail pa DNM, e operador di tour aki cu ta ignora ley y ta ofrece e actividad di core cabay riba beach. Den e mail, cual a yega na mesa di redaccion di Bon Dia Aruba, ta splica cu riba e website di Gobierno di Aruba ta poni cu DNM tin un Inspectiedivision cu ta detecta actonan criminal manera stipula den ley y reglamento… y tambe ta registra notificacionnan tocante naturalesa y medio ambiente. E departamento aki ta autonomo den trahamento di rapportnan oficial y den encaminacion di esakinan pa sancion of persecucion.

“Ohala cu e email aki porfin lo provoca accion contra un operador di tour riba cabay cu ta promove y conduci tournan di beach abiertamente na e parti nort di e isla cu ta daña tereno di neishi Shoco (y otro) terenonan di neishi y ta susha e beach. Articulo 25 di e Decreto Nacional Playanan y Costanan Publico ta identifica e actividadnan aki claramente como ilegal. Lamentablemente, den e aña desde cu mi a purba di yama atencion na esaki pa ultimo biaha e situacion a bira solamente pio,” e persona a enfatisa.

E operador di tour cu ta ofrece e actividad aki, e persona a remarca, no ta purba di sconde esaki door di bay mainta trempan, nan ta haci propaganda abiertamente di e tournan aki henter dia sin tene cuenta cu loke ley ta bisa, y a hasta a lanta un billboard riba e caminda grandi di Savaneta pa Oranjestad haciendo propaganda pa un Beach Ride cu un potret completo di siete cabay cu persona riba nan riba e santo di beach.

E persona aki ta cuestiona con niun hende di DNM, polis of gruponan di naturalesa a tuma nota di esaki. El a señala cu riba e website di e rancho ta mustra cu nan a publica alrededor di 20 potret di coredonan di cabay riba beach, cu otronan publica pa nan invitadonan. “Cada potret cu nan ta publica ta un confesion di culpa diferente,” el a subraya.

Segun e persona a menciona e rancho su propaganda riba website caminda por book tours y actividadnan turistico, ta mustra e potret corta for di e borchi di propaganda cu e titulo “Aruba Ecological and Beach Horseback Ride” cual el a enfatisa lo ta “comico si no ta asina serio ya cu trapa habitat natural na un destinacion prohibi casi no ta ecologico.”

Ademas e propaganda ey a señala nan como “Best Seller” recientemente, locual ta lanta e lanta e pregunta cuanto biaha pa dia nan ta haci e actividad aki, cu ta prohibi, pa por a yega na e titulo di “best seller”.

“Nada contra di tournan riba cabay; cabay ta parti di naturalesa y no ta importa unda den cunucu nan ta bay basta nan keda leu for di e playanan manera ley ta rekeri… Si nan no ser ordena pa stop awor y responsabilisa nan mes e ora ey otro companianan di tour lo sigui riba otro playanan – algun ta cuminsa haci propaganda caba. E ora ey e naturalesa intacto di bo playanan ta disparce,” el a enfatisa.

Bon Dia Aruba a tuma contacto primeramente cu DNM pa haci pregunta tocante e situacion aki en particular, pero DNM a informa cu pa loke ta trata casonan cu ta relaciona cu e ‘Landsbesluit Openbare Wateren en Stranden Aruba’ mester tuma contacto cu KPA.

 

Bon Dia a tuma contacto cu vocero di KPA, Liliana Rasmijn y a puntra si den e caso aki tin accion cu por ser tuma pa enforsa e ley, si ta monitor si e ranchonan ta volg e ley y si tin algun consecuencia den caso cu no sigui e ley.

Sra. Rasmijn a indica cu e lo busca mas informacion pa asina duna contesta corectamente informa na e preguntanan. Keda pendiente pa informacion riba e topico aki.