Hulanda ta insisti riba e rekisito pa e Ley di Reino pa Supervision Financiero na Aruba drenta na vigor, despues di cual por refinancia e debe di sosten di likides di tempo di pandemia cu un tasa di interes faborable. Prome minister, Evelyn Wever-Croes a indica cu Den Haag kier un contesta prome cu dia 1 di september.
A pesar cu gobierno Hulandes ta demisionario, ta sigui insisti riba e vinculo entre e Ley di Reino y e refinanciamento di e casi un biyon florin di sosten di likides cu Aruba a ricibi durante e crisis di coronavirus, manera portalnan noticiero incluyendo Aruba.nu y NoticiaCla ta reporta.
E fecha pa Aruba paga back su debe, si no logra refinanciamento, ta poni pa dia 10 di october. E obstaculo riba e caminda aki ta Parlamento di Aruba, cu ta kere cu e Landsverordening pa supervision financiero ta suficiente pa cumpli cu e tarea di supervision. Sinembargo, Hulanda no ta di acuerdo pasobra den caso di un ley local, Hulanda no lo tin nada di bisa.
Segun prome minister, gobierno di Aruba ta trahando riba su propio input pa e concepto di e Ley di Reino pa Supervision Financiero, bisando cu nan ta poniendo esaki riba papel pa mand’e.
Ademas di gobierno, Tweede Kamer na Hulanda tambe ta poniendo hopi enfasis riba e Ley di Reino pa Supervision Financiero, particularmente despues cu parlamentarionan Kamminga y Van den Berg a entrega un mocion pa gobierno Hulandes no refinancia e debe di Aruba si no ta cumpli cu e condicion aki.
Den Tweede Kamer di Parlamento Hulandes a tuma lugar luna pasa un debate pa trata algun mocion di diferente parlamentario encuanto e situacion na e islanan di Reino Hulandes den Caribe. Pa Aruba tabata di special importancia un mocion di Sra. Roelien Kamminga (VVD) y Joba van den Berg (CDA), cu tabata un accion pa sigura cu Aruba lo no haya extension di e prestamo haci durante e crisis di Covid-19 a base di condicion faborable, interes abao, si gobierno di Aruba no ta dispuesto pa acepta e ley di Reino di supervision financiero.
Tambe den e mocion ta pidi gobierno Hulandes pa maneha un interes mas halto segun mercado pa e prestamo tanten no tin un ley di Reino pa supervision financiero vigente, “y si den e periodo venidero lo tin paso significativo tuma den direccion di e entrada na vigor di tal, refinancia e prestamonan solamente a corto plaso cu un porcentahe di interes cu ta pas cu e situacion cu ta en todo caso mas halto cu e interes bao di condicion faborable.”
E mocion den su totalidad ta bisa:
E Camara, despues di a considera e deliberacion, reconociendo cu durante periodo di coronavirus, ademas di regalo financiero y ayudo di emergencia, Hulanda a duna prestamonan di mas cu 1 biyon euro na Corsou, Aruba y Sint Maarten (CAS), di cual a duna Aruba 441.7 miyon euro bao condicionnan faborable;
Reconociendo cu a haci un acuerdo cu, banda di reforma, lo tin supervision financiero adecua mediante un ley di Reino, y a entrega un propuesta pa esaki na Tweede Kamer cu consenso di gobierno di Aruba na 2022;
Notando cu e discusionnan relaciona cu e ley di Reino riba supervision financiero pa Aruba tin ya tres aña ta andando;
Considerando cu e prestamonan di likides mester wordo paga back of refinancia pa dia 10 di october 2023, y cu Hulanda tin meta pa refinanciamento a largo plaso como un contribucion pa logra un presupuesto mas sostenible y viable;
Observando cu e tasa di debe di Aruba ta keda significantemente halto y hopi riba e porcentahe desea pa un economia di isla chikito;
Notando cu e acuerdonan riba standardnan presupuestario den e LAft (ley temporal pa supervision financiero) pa Aruba ya a caduca, y cu e Protocol entre Aruba y Hulanda ta bay caba dia 31 di december 2023;
Di opinion cu supervision adecua ta esencial pa un futuro economico sostenible y saludable, y ademas, pa finanzas publico viable y sostenible;
Ta solicita gobierno pa refinancia e prestamonan di likidez a base di largo plaso bao condicionnan faborable solamente na momento cu tin supervision financiero basa riba un Ley di Reino;
Ademas, ta solicita gobierno, tanten cu no tin supervision financiero mediante un Ley di Reino, pa aplica tasanan di interes regular riba mercado capital, y den caso cu tuma stapnan significante na caminda pa un Ley di Reino den e periodo nos dilanti, pa solamente refinancia e prestamonan a base di termino cortico te cu e ley drenta na vigor, usando un tasa di interes cu ta apropia pa e situacion y ta, en todo caso, mas halto cu e condicionnan faborable.
