A pesar cu documento di Hulanda su condicionnan ta disponibel; No tur sindicato y gremio comercial a expresa su posicion na gobierno

Ayera mainta a tuma luga e dos ronda di consulta entre gobierno, sindicatonan y gremio comercial.

E reunion aki tabata bon concuri. Mescos cu esun prome cu a tuma luga siman pasa. E biaha aki tabatin un diferencia substancial. E documento cu ta contene e pakete di alrededor di 18 condicion di Hulanda cu tabata bao embargo, a bira publico.

E biaha aki no a critica hopi e forma con Hulanda a impone nan condicionnan. Sinembargo no tur representante presente di e diferente organisacion a vocifera un posicion habri riba e condicionnan di Hulanda pa pais Aruba.

Sindicatonan y gremionan

Pa loke ta e sindicatonan y gremionan comercial nan punto di bista, esaki tabata depende di cada un di nan interes of tereno. Nan puntonan di atencion tabata riba tereno di aparato gubernamental, finanzas publico, pensioen, gasto di personal, reforma sector salud, belasting, sector financiero, etc… Pero tambe e decision final riba e dos Consensus Rijkswet.

Bon Dia Aruba ta trece algun di e puntonan di bista expresa pa e representantenan di e sindicatonan y gremionan comercial presente. Pa Camara di Comercio Aruba (KvK) e decision aki tin su impacto socioeconomico pa nos pais. Sinembargo nan a manifesta nan confiansa riba e decision cu finalmente gobierno lo bay tuma eventualmente awe. Nan ta sostene e eleccion aki.

Sindicato FTA a expresa su preocupacion riba e parti di flexibilidad di e ley laboral. Nan ta mira cu e flexibilidad aki no lo garantisa siguridad laboral. Ademas lo aumenta cupo di desempleo y salario mas abao. FTA a pidi pa e punto aki mester wordo studia bon y cu sindicato por participa den e analisis di esaki.

SEPPA ta haya cu e condicion pa bin cu mas flexibilidad riba nos ley laboral ta un sorto di neo-liberalismo cu Hulanda kier bin cune. Tambe nan ta kere cu e tipo di neo-liberalismo aki lo trece insiguridad den e clase laboral, menos salario y traha mas. Menos salario kiermen mas pobresa. Nan ta contra di e condicion aki, ya cu stabilidad laboral ta den peliger. E preocupacion aki, premier Wever-Croes a bisa cu nan kier trat’e den e dialogo tripartiet. Esaki ta un punto cu Aruba lo pidi Hulanda espacio p’e.

SIMAR a pidi pa pais Aruba por haya espacio pa sigui dialoga riba e condicionnan y cambionan cu nan lo trece, incluso pa nos tereno di enseñansa.

AHATA a indica cu e Consensus Rijkswet ta algo transitorio, y sigur tin puntonan cu nan ta di acuerdo y cu lo yuda acelera e proceso di nan. E ta algo pa un era nobo y resiliente pa Aruba, y nos por cu e reto aki. AHATA ta sigui apoya e proceso aki cu Hulanda, caminda nan ta pidi pa tene cuenta cu e inversionistanan di afo.

SADA a abstene di duna un posicion riba e condicion di Hulanda, y si pais Aruba mester acepta nan si of no. Aunke nan tabatin e documento, e ta uno hopi compleho cu mester tempo pa studia bon y dun’e su debido interpretacion. Pero si nan a trece nan preocupacion como sindicato di ambtenaar, riba reduccion di gasto di personal.

Mientras SPA a abstene tambe di duna nan posicion, ya cu tur decision ta wordo tuma den consenso cu nan miembronan. Wever-Croes a referi cu awor cu gobierno tin e documento completo, Hulanda ta kere cu un 10% di nos GDP mester ta e gasto di personal di gobierno. Te ainda gobierno no tin un plan pa yega na e cifra ey, y si nan ta bay acept’e. E ta otro punto pendiente pa sigui delibera cu Hulanda, pero tambe cu sindicatonan di empleadonan publico.

Tanto SIWA como STT cu ta representa respectivamente e trahadonan di e companianan estatal di WEB y SETAR, a pidi pa gobierno no bende ni entrega e maneho di companianan aki na Hulanda. Nan ta compania cu a bira un rol model den nos region, y ademas nan ta produci dividend pa gobierno.

ATIA a yega di trece dilanti cu nan ta di acuerdo cu hopi di e reforma proponi pa Hulanda. Aunke e instancia Caribische Hervormings Entiteit (CHE) lo trece extra control riba nos pais. Tambe e gremio comercial aki ta haya cu acepta e sosten financiero di Hulanda, no ta mengua prome minister su liderazgo.

ABV como sindicato di hospital a cuestiona e hecho cu Hulanda kier corta 5 miyon for di AZV, locual tin su impacto riba e servicio di salud cu nos pais mes ta brinda. Ya cu varios cuido ta wordo ofreci na Aruba mes, sin mester manda e pashent afo.

P’esey nan ta cauteloso riba e proposicion di Hulanda pa pais Aruba traha den aliansa cu Corsou y St. Maarten riba prestacion di servicio di salud. Mientras cu nos tin un Imsan cu a bira un instituto importante riba e tereno aki pa nos hende no bay otro caminda pa haya e mesun servicio aki. E ta un discusion pendiente cu ainda mester atende cu Hulanda.