Luis Chong, kende ta director encarga di e seccion di Gele Koorts en Muskieten Bestrijding (GKMB) cu ta resorta den departamento di salud publico (DVG), a informa cu un biaha mas nan ta preparando un campaña tocante criadero di sangura, awor cu nos isla ta bay drenta den temporada di yobida.
Actualmente, mirando cu Aruba ta pasando den un temporada di secura, e criaderonan di sangura a mengua hopi. “Actualmente no nos tin problema di sangura di Dengue,” Chong a bisa. Aworaki tin problema di sangura di manglo den e districtonan di Pos Chikito y Savaneta, pero nan no ta un peliger pa salud. Si e ta un molester grandi, principalmente pa e habitantenan, y GKMB ta atendiendo cu esey, el a bisa.
Sinembargo, Chong ta haya cu nan participacion diasabra awor den e feria di salud organisa pa AZV, ta net un bon momento pa e publico presente bay bishita nan stand y busca informacion pa protege nan mes, y evita e problematica di sangura cu ta transmiti malesanan manera Dengue, Chikungunya y Zika. Nan a cuminsa prepara caba, ya cu nan sa cu unabes awa ta cuminsa yobe, e casonan di criadero ta cuminsa subi
GKMB ta cuminsa bishita algun barionan cu nan sa cu por surgi problema. E ta haya cu informacion ta un bon instrumento pa conscientisa nos comunidad. Nan mester sigui duna informacion y ripiti e procedura cu nan tin cu haci pa tene nos cura limpi di criadero di sangura.
E ta consciente cu como departamento, GKMB no por gana su so nunca e bataya contra e sangura Aedes aegypti. Pa combati e criadero di sangura, nan mester ayudo di henter nos comunidad.
