Portal Caribbean Loop News a reporta cu Aruba y Corsou a priminti pa manda generator adicional pa yuda e Sint Maarten cu e problema serio di coriente cu e ta enfrentando na e momentonan aki.

Segun e portal ta indica, prome minister interino, Veronica Jansen-Webster a bisa cu Sint Maarten ta gradici e solidaridad demostra pa Corsou y Aruba, su partnernan den Reino, cu a priminti di manda generators adicional pa yuda Sint Maarten.

El a bisa cu e gesto aki, sinembargo, tin mester di coordinacion cu forsa militar pa transporte, un proceso cu e gobierno ta inicia.

Segun e noticiero local di Sint Maarten a indica, e problema di coriente na e isla a cuminsa desde 5 di mei ora cu un fayo den un motor di e planta di electricidad a ocasiona un blackout completo na e isla.

E crisis di electricidad a escala na momento cu un candela den e boiler di asistencia di motor 9 a causa interupcionnan adicional, tirando motor 8 y 9, hunto cu e motor 19 cu tabata afecta caba anteriormente, afo di operacion.

Esaki ta resulta den un perdida den e capacidad di produccion di electricidad, cu a afecta severamente e red di electricidad di e isla.

E hecho cu Aruba ta compromete su mes pa manda generators adicional pa asina yuda Sint Maarten cu su problema di coriente ta confuso mirando cu Aruba mes ta purbando di soluciona su propio problemanan cu e red di suministro di coriente pa motibo di e cantidad halto di interupcionnan di coriente cu e isla a experiencia durante e ultimo lunanan.

Pa purba soluciona e situacion aki, Gobierno di Aruba a hasta manda busca expertonan Mericano di MPR pa bin haci un investigacion riba kico ta locual ta ocasiona e interupcionnan y kico nan ta recomenda ELMAR pa haci pa asina mehora e suministro di coriente y evita cu mas interupcion di coriente ta sucede.

E expertonan a presenta e resultado di nan investigacion den cual a sali na cla cu e red di suministro di coriente ta deteriora pa motibo di e tur e añanan cu no a haci mantencion. Nan ta recomenda pa ELMAR delinea cual ta e areanan di prioridad pa cuminsa traha riba esaki pronto, pero a pesar di esaki, no lo tin un mehoracion den e red di biaha mirando cu e mantenemento tin diferente obstaculo, entre otro e suministro di e ekipo y material necesario pa por realisa e mantenemento.

BZK: Aruba no tin capacidad pa manda generator

Sinembargo, mas laat den atardi, vocero di ministerio di Asuntonan di Reino (BZK), Karin Fraai a informa NoticiaCla cu na final, Aruba no a logra manda generator pa Sint Maarten debi cu “Aruba no tin generator di e capacidad ey pa yuda cune.”

“E paisnan Corsou y Aruba ta pensa hunto pa e solucion pa Sint Maarten,” segun Fraai, “sinembargo, aworaki Aruba no por suministra generatornan di e capacidad aki.”

Ademas, Fraai a sigura cu ta sigui busca den region pa haya un solucion pa Sint Maarten.

Segun NoticiaCla, Corsou tampoco a logra yuda na final, pa motibo cu no tabatin e material disponible.