(DutchNews) – Princess Amalia a tene un fiesta pa celebra su di 18 cumpleaños siman pasa aunke e Gobierno a urgi pueblo pa no invita mas di 4 persona na nan hogar pa causa di coronavirus.
Segun De Telegraaf, tabatin mas o menos 100 persona na e fiesta, cual a ser organisa na e hardin di Huis ten Bosch, pero e estado su servicio di informacion RVD ta isa cu 21 persona a ser invita, y no tur persona a atende.
Prome Minister Mark Rutte a conta parlamento cu e fiesta a tuma luga. “Amalia a haci aña siman pasa, un momento importante den su bida,” el a expresa. “Riba diasabra, a organisa un fiesta na ultimo momento den e tereno patras di e palacio.”
Rutte a bisa cu tur persona cu a atende tabata vacuna y a ser pidi pa tuma un test di coronavirus prome cu a atende e fiesta.
“E famia tabata convenci cu si tene un fiesta pafo cu tur e precaucionnan necesario, e lo ta un fiesta organisa di un manera responsabel,” Rutte a bisa den su carta. Sinembargo, tambe el a bisa “e Rey a bisa cu mirando bek, e no tabata corecto pa organisa esaki.”
“Mi ta considera esaki un reaccion sensibel,” Rutte a comenta.
E no ta prome biaha cu e famia real ta kibra regulacionnan di coronavirus. Den juni, Willem-Alexander a ricibi critica di Ministernan pa motibo cu el a kibra reglanan durante un reunion cu fanaticonan di futbol, ora cu el a ser mira ta duna man na nan y no teniendo cuenta cu distanciamento social.
Den october di aña 2020 su persona y su famia a biaha bay Grecia durante un momento unda cu biahe internacional no tabata conseha. Den augustus aña pasa, atrobe na Grecia, su persona y Reina Maxima a ser fotografia parando banda di un bendedo local.
