Segun lider di fraccion di MAS Marisol Lopez-Tromp: Pasamento di e ley di FASE ta pa purba evita cu ministernan cu a haya nan mes cu rapportnan concreto di Centrale Accountant Dienst (CAD), wordo persegui penalmente. Rapportnan di CAD cu ta cla pa basta tempo pero cu ta te awo, mei ora prome cu e reunion publico cuminsa, parlamento a haya e rapportnan aki. Rapportnan cu ya tabata cla como un aña pasa!

Esaki ta pa evita cu personalmente e ministernan por wordo teni responsabel pa cualkier acto prescribi den e rapportnan cu no ta segun ley. Den cualkier circumstancia, cualkier minister di cualkier asignatura lo a haya su mes cu consequencia di esaki. Por ehempel den forma di investigacion, cu caso penal y e minister lo mester carga su responsabilidad. Pero pa e ministernan di MEP, nan si ta wordo absolvi.

Locual ta hopi duidelijk scirbi den e rapport aki ta cu votando pro pa e ley aki, bo ta legalisa cu forsa retroactivo tur loke e mandatarionan aki a haci robes. E ley aki ta pa tapa tur cos robes y contra ley cu e ministernan a haci cu placa di FASE e ultimo dos añanan. Fraude, abuso di poder y funcion, favoritismo y tambe corupcion, cu e articulo 9.2 den e ley, tur e actonan aki a wordo legalisa. Votando pro pa e ley aki, a kita e responsabilidad ministerial di tur consecuencia di fayonan cu e ministernan aki a comete.

Ta bai un stap mas leu: a politisa FASE siendo cu e mester ta pa tur hende y tabata pa tur hende. Pero e forma con a core campaña cune door di partido MEP y e forma con e minister a vocifera cu tanten cu MEP ta den gobierno FASE ta continua, ta dunabo di conose cu a uza FASE como un tool di campaña y a manipula e votadornan.

Bisando esaki e minister a percura pa politisa y a pone cu e 3 mil y pico hendenan cu no a haya FASE por ta den incertidumbre di pakico nan no a hay’e. Te awe nan no tin claridad riba esaki, mirando cu no por averigua den e sistema con criterianan a wordo cambia.

“Lesa e rapport bon y bo ta wak e motibo: e articulo 9.2 ta manera cu e ta y pa e motibo ey ta bai pasa e ley awe, y nos en todo caso ta vota contra” Asina lider di fraccion di MAS Marisol Lopez Tromp a finalisa bisando.