A marca historia: Dos candidato sospechoso pa husticia di Aruba riba lista politico

Entrega di lista a tuma luga diabierna ultimo, na unda nos por a mira cu dos candidato di dos partido politico a postula pa eleccion dia 25 di juni, siendo cu na e momentonan aki nan ta sospechoso penal di husticia di Aruba.

Partido POR a presenta un lista “completamente cambia y reforma” segun su lider Alan Howell a expresa.

Tocante esaki, Howell a indica cu gran parti di nan candidato – cu ta 16 – ta basta hoben, dinamico y cla pa subi lista pa asina nan duna nan miho pa nan pais.

Manera Bon Dia Aruba a publica dia 13 di april ultimo den un articulo cu ta papia di integridad, a trece dilanti cu Ministerio Publico, den un comunicado, a informa cu nan a cuminsa un investigacion penal na unda lider di partido POR, Alan Howell ta envolvi den supuesto malversacion di fondonan publico.

Despues di entregamento di lista, Bon Dia Aruba a tuma contacto cu Howell tocante kico e ta pensa di integridad y con importante integridad ta pa su persona, no solamente como politico sino como un persona cu a traha 26 aña pa Cuerpo di Polis di Aruba, manera el a sigura.

Tambe a puntra kico Howell ta pensa cu diabierna tabata un momento historico den cual dos partido politico a entrega nan lista di candidato, siendo cu tin dos sospechoso penal riba lista como candidatonan. Un di nan ta Howell lider di partido POR y otro ta Benny Sevinger di AVP kende ta involucra den caso Avestruz, cu ta hayando forma caminda nos por a mira algun detencion a tuma luga.

Ademas, den declaracionnan pa medionan di comunicacion di diabierna ultimo, Howell a papia tocante screening di candidato cu antecedente penal den partido POR pa nan por ta riba lista. Bon Dia Aruba a puntra kico esaki ta encera y pa finalisa a pidi pa su persona si por duna un mensahe di integridad na su sostenedonan y personanan cu kier pone su confiansa den partido POR.

Bon Dia Aruba a tuma contacto cu Howell via plataforma di Whatsapp y via telefon caminda Howell a nenga pa di cuater biaha contesta e preguntanan di e corant aki.

Di mesun manera, diabierna ultimo durante declaracionnan di e lider di partido AVP Mike Eman pa loke tabata trata entregamento di lista, Bon Dia Aruba a puntra Eman tocante e caso di Benny Sevinger cu ta sospechoso pa husticia den e caso Avestruz, y cu manera a keda conoci, el a subi riba lista di partido berde como candidato number 29.

“Mi ta convenci cu e ta inocente. P’esey e ta riba lista. Nos ta confia pueblo pa dicidi.” Eman a bisa cu Sevinger a tuma un posicion noble y esaki ta uno di respet pa institucionnan.

Segun e ‘Beschikking Huiszoeking’ cu Bon Dia Aruba a haya, ta poni cu ta sospecha cu Sevinger a haci su mes culpabel di falsificacion di documento cu ta cay bao articulo 2:184 di Codigo Penal di Aruba; estafa segun articulo 2:305 di Codigo Penal di Aruba, aceptacion di soborno bao articulo 2:350/2:351 di Codigo Penal di Aruba; mal uso di su funcion cu ta cay bao articulo 2:354 di Codigo Penal di Aruba; y labamento di placa cu intencion/custumber cu ta cay bao articulo 2:404/2:405 di Codigo Penal di Aruba. Despues di varios luna, na januari di 2021 e di dos entrada hudicial na cas di Sevinger a tuma luga, y segun declaracion di e politico mes, esaki ta trata di persecucion politico.

Loke ta remarcabel ta cu Bon Dia Aruba a haya cierto documento den cual ta indica cu dia 10 di maart di 2014, ex-minister Sevinger a haya un carta di director di compania Elenath Development & Contractor na unda ta pidi un tereno comercial cu e number di parcela 3867 na Sasakiweg. Segun e documento aki, riba e mesun fecha e minister ta pone direct pa DIP akkoord conform gaarne uw medewerking, na unda cu Leoncita Arends a bende e opcion di tereno aki pa un suma di AWG 555.000, caminda e ta pidi pa deposita AWG 10.000 florin riba un cuenta na un banco local y AWG 60.000 na cash, y e resto di AWG 485.000 riba otro cuenta di su persona na otro banco local.

Diabierna ultimo dia 7 di mei, Ministerio Publico a publica un comunicado na unda ta indica cu hues-comisario a duna orden pa continua detencion (gevangenhouding) di e sospechoso Leoncita Arends cu 60 dia y detencion (bewaring) 8 dia di e sospechoso di fam Abbath cu a ser manda KIA. Siman pasa Landsrecherche a detene tambe Pieter Susebeek y diabierna ultimo hues-comisario a duna orden pa prolonga su detencion (inverzekeringstelling) cu 8 dia mas.

Bon Dia Aruba tambe a tuma nota cu e ex-minister di Labor, Paul Croes ta campañando cu partido AVP banda di Mike Eman. Croes a wordo condena pa Corte di Prome Instancia pa comete seis diferente delito: comete den conhunto (delito di) pidi y acepta soborno, abuso di su funcion, comete den conhunto sustraccion (verduistering), comete den conhunto labamento di placa regularmente, comete den conhunto duna empleo ilegal y participacion na un organisacion criminal eherciendo como minister den Gabinete Mike Eman 2, cu un castigo di cuatro aña di prison.

Tambe Otmar Oduber, cu despues di un trayectorio largo cu partido AVP a dicidi di lanta su mesun partido POR, y cu awor ta sospechoso pa caso Flamingo. A puntra Eman si esaki por toca integridad di partido AVP, pa lo cual el a contesta: “No, mi ta kere cu si bo mira cu e procesonan cana, bo tin cu laga husticia prevalece, loke nos ta kere cu hopi di e casonan aki ta lanta e interogatorio pakico cada bes ta enfoca den un direccion”.

Di mesun forma, el a trece dilanti cu “mi a menciona tur e cantidad di miyones di florin cu cada bes ta bay na un sorto di famia y nos no ta wak ni un caso ey, ni un huiszoeking pa mira un rato unda e conexion ta entre e decision pa e oficina di e abogado ey, of e huur contract ey, y e relacion cu por tin den esun cu ta wordo beneficia” Eman a sigura.

Pa finalisa, el a bisa “no ban husga lihe y ban purba di haya un tiki di miho panorama di e situacion di husticia na Aruba, husticia mester haci su trabao y pa nos como AVP nos ta para pa esey semper, pero nos kier pa ta imparcial si” Eman a finalisa.