Dialuna anochi, riba dia internacional di derecho di mucha, a lansa oficialmente e toolkit pa loke ta Codigo di Proteccion (CDP) y su revista. Un momento sumamente bunita, caminda a presencia e resultado di e dedicacion di e ekipo di CDP cu a haci esaki posibel. Ta trata di un plataforma digital caminda ta inverti den nos profesionalnan door di duna nan hermentnan pa por eherce nan trabou mucho mas miho y garantisa proteccion pa nos muchanan.
E toolkit aki tin di haci cu e Codigo di Proteccion, pues awo a converti den un proyecto mucho mas sostenibel y duradero. Importante pa menciona ta cu UNICEF Hulanda a aporta pa guia e trayecto aki, sin mas e contenido di e toolkit aki a wordo forma door di Departamento di Mucha y Hoben cu a lidera henter e proyecto. Tambe, a conta cu un grupo di trabou cu a percura pa e contenido, consistiendo di 17 profesional di e cuater sectornan; husticia, social, salubridad publico y enseñansa. E grupo di trabou aki, a acerca alrededor di 70 profesional den e veldnan cu a percura pa duna contenido na e toolkit aki.
Gobierno di Aruba ta percura pa legislacion, maneho, procesonan di trabou pa asina por garantisa proteccion pa nos muchanan. Bisando esaki, un paso hopi importante ta inverti den nos profesionalnan cu mester haci e trabou aki, y a traves di e toolkit aki ta percura pa tin inversion ta tuma luga continuamente den e profesionalnan a traves di “online learning”, videonan, articulonan, preguntanan y respuesta, peer-to-peer brainstorming pa yega na ideanan nobo.
Ministerio di Husticia y Asuntonan Social ta sostene e proyecto aki y ta gradici cada profesional cu a percura pa esaki por ta posibel. Un danki y un pabien na e ekipo completo di Codigo di Proteccion, Departamento di Mucha y Hoben, e 70 profesionalnan den e veld social, hudicial, salubridad publico y enseñansa. Tambe un danki na UNICEF Hulanda.
