Michelmira Arends ta un studiante na Universidad di Aruba y ta den su di 3 aña di Social Work and Development y actualmente e ta haciendo su pasantia (stage) na Fundacion Respeta Mi. Hunto cu e fundacion Arends kier investiga e rol di e Fundacion Respeta Mi den e comunidad y tambe e percepcion di abuso y negligencia di mucha na Aruba.
Riba pagina di Facebook oficial di Fundacion Respeta Mi, a publica e investigacion y segun e encuesta ta indica, e resultadonan di e investigacion aki lo contribui cu informacion ariba con frecuente e servicionan di e fundacion ta wordo usa, con pa informa comunidad tocante fundacion, e conocemento di abuso di mucha den comunidad y cual ta e formanan di abuso cu a wordo experencia.
Ademas, e encuesta ta enfatisa cu e informacion aki ta necesario pa Fundacion Respeta Mi por desaroya plannan sostenibel pa futuro. E investigacion aki ta pa participantenan mayor di 18 aña di edad.
Fundacion Respeta Mi a wordo funda na aña 1991 bao e nomber Fundacion Contra Abuso Sexual di Mucha y na 2010 a cambia e nomber oficialmente pa Fundacion Respeta Mi. Mirando e casonan di abuso sexual cu tabata tumando luga, e trahadonan social e tempo ey tabata kier contribui na prevencion di esaki pa medio di brinda informacion y trece conscientisacion ariba topico aki.
Fundacion Respeta Mi ta contribui na prevencion di abuso di mucha cu ta enfoca ariba e trabou preventivo y no curativo. E meta di e fundacion ta pa tin suficiente personal profesional y educa disponibel pa yuda den e area aki.
E encuesta ta remarca cu e fundacion a formula un plan di maneho y ta implementando esaki pa sigura cu su mesun miembro-, personal- y profesionalnan cu ta traha den e sector social, educacional, huridico y medico den e ramo di prevencion di abuso di mucha ta wordo educa continuamente y ta ricibi training.
“Esaki mester conduci na mehoracion di cooperacion bao di diferente instancia na Aruba y cu ta wordo traha ariba formulacion di un plan integral ariba tereno di abuso di mucha. E publico general tambe ta wordo continuamente informa y conscientisa tocante kico ta abuso di mucha y e necesidad pa prevencion di abuso di mucha y e posibel alternativanan,” e encuesta ta señala.
E encuesta ta tuma aproximadamente 15 minuut y participacion di tur persona ta completamente boluntario y anonimo. E informacion comparti lo keda confidencial.
