A kita director… Y… tur cos ta bon?

Porfin a yega e dia cu hopi hende tabata spera y cu dado momento tambe hopi a kere cu e no lo yega nunca: a anuncia salida di director di hospital. Esey ta bon noticia, no den sentido personal pa cu e director mes, pero ta trata aki di funcionamento di e entidad pa cual e tabata responsabel. Pa varios aña caba tabata obvio cu sin cambio drastico den maneho general di e institucion no ta logra un funcionamento na e nivel rekeri. Y e problemanan fundamental ta data di prome cu entrada di e persona aki den e puesto di responsabilidad ey.

Lamentable ta cu desde e momento ey nada a drecha, al contrario, tur cos a sigui empeora. Riba e funcionamento deficiente a bin e periodo di expansion y renobacion di hospital, cu desde prome dia a trece duda den e forma cu tabata maneha esaki, di e destaho cu a trece debate fuerte te na e fase reciente, unda a bin detecta cantidad di fayo y deficiencia, cu lo por a evita si tabatin un miho planificacion y ehecucion.

Y mientras tanto, e otro problemanan a sigui nan curso. Problema di falta di un medico specialista na cabes di e organisacion, retiro di e director financiero sin cu tin reemplazo, comunicacion deficiente cu e specialistanan, problema financiero, cu ta resulta den falta di material vital, problema cu construccion deficiente cu ta coresponsabel pa un tsunami den hospital, problema cu corupcion y fraude den laboratorio, di cual publico aparentemente no mag sa ta kico exactamente a pasa y kico ta bay haci cu e culpablenan. Ta bon pa realisa cu den e ultimo caso menciona aki no ta trata di mal maneho so, a base di otro pensamento cu despues ta resulta eroneo. No, aki ta trata di ‘white collar crime’ di nivel, unda prizon lo mester ta warda esnan envolvi. No mester lubida cu aki ta trata di robo di casi un miyon di placa di pueblo, y e pregunta ta ken ta responsable pa permiti e tipo di cos aki, y cu ademas te dia di awe no ta actua manera mester ta. Cu ki cara nos autoridadnan ta papia di husticia pa tur, mientras cu den e caso aki aparentemente esnan culpable ta haya un manera regala pa no mester duna cuenta. Esaki no ta nada menos cu un invitacion na e ciudadania pa di awor en adelante nan busca crimen pa comete, pero si e tipo di crimen di ‘alcurnia’ aki pa bo por haya bo ‘free pass’.

Awor, tur e problemanan aki a bin resulta den un monton inevitabel, pa cual e director tabata e prome yama pa haci algo, pero esey no a sucede. Pero, ora e no tabata actua, o no tabata actua cu e diligencia cu por y mester spera di un persona den su posicion, ken ta esnan cu tabata responsable pa pone orden? Ken ta esnan cu mester a percura pa cosnan sucede, y si nan no tabata sucede na tempo, cu mester a actua? E director, como miembro di e Raad van Bestuur (management) ta subordina e Raad van Toezicht, e berdadero ‘bestuur’ den sentido di ley di e fundacion cu ta finalmente responsable pa e maneho di e entidad. Y kico nan a haci? Sinta tapa tur e baina cu tabata sucediendo, sin actua debidamente, esey ta e realidad. Nos no tin custumber di ta di acuerdo sin mas cu ningun mandatario, pero cu e ta bisa cu no ta e director so mester bay, sino henter e hunta di supervision, esey ta mas cu obvio. Si no, anto e speransa cu e mandatario a expresa den e dianan aki, cu lo cuminsa un era nobo cu e retiro di e director, lo no bira realidad. Pa deficiente cu e director tabata funciona, e asunto nunca lo a yega asina leu si tabatin hunta di supervision cu tabata actua contundentemente. E solo hecho cu no a busca un reemplazo pa e director financiero y a laga e director maneha tur asunto su so, ta duna muestra di e hecho cu e hunta di supervision no tin nocion di kico nan ta haciendo, y ta bira tempo pa tuma paso drastico pa di berdad algo por cambia den sentido positivo. Al fin y al cabo, ta trata di un di e institucionnan mas vital den nos comunidad.

Sin embargo, nos mester realisa cu e problema aki no ta unico, solamente cu net den e caso aki a laga e asunto keda putri mas cu den otro, cu e resultado fatal aki. Na mas di un oportunidad nos a mustra den e medio aki riba e deficiencia grandi cu tin den maneho di gobierno mes, y den e entidadnan cu ta conforma gobernacion den sentido amplio. Y…, nos ta mira mehoracion na caminda? Lamentablemente no, y esey tin su motibo. Ban clarifica esaki den forma di un pregunta: nos ta mira gobierno actuando pa mehora e ‘framework’ dentro di cual tur e entidadnan aki mester funciona? O acaso no ta berdad cu tambe e gobierno aki a reparti puesto den tur e entidadnan cu nan tabata por, segun e mesun regla di wega di semper? Unda regla di bon gobernacion a keda, y e conducta cu ta coresponde cune?