Departamento di Agricultura, Cria y Pesca, Santa Rosa Aruba, ta trahando hunto cu Ministerio di Naturalesa pa lansa un proyecto piloto pa scolnan basico haya e oportunidad di crea un plantacion di mata den forma di agroforesteria sintropico (syntropic agroforestry).
Santa Rosa y Living Soil ta trahando hunto cu Departamento di Naturalesa pa duna scolnan basico guia y sosten di material pa por crea plantacion di mata riba nan tereno. Ademas, personal di scol y boluntarionan lo ricibi training tocante e tecnicanan di agroforestry, mantencion y cuido di e plantacion di mata, como tambe e integracion di esaki den e curiculo escolar.
No ta un secreto cu Aruba ta depende un 99% riba importacion, loke por nifica un problema grandi pa e isla. Durante pandemia di COVID-19 ya caba pueblo di Aruba a experencia e efectonan negativo cu e dependencia aki por tin, y ta sigui sinti e efectonan aki pa motibo di aumento di prijsnan ariba nivel global.
E cambionan economico y aumento den costo di bida e ultimo añanan a inicia un combersacion tocante e importancia di seguridad alimenticio. Santa Rosa Aruba ta colaborando tambe cu Web y hunto cu Ministerio di Naturalesa pa a baha e tarifa di awa pa agricultornan y pa inculca balor di plantamento den e siguiente generacion.
E iniciativa aki tin como meta educa e siguiente generacion riba e balornan di agricultura sostenibel mientras ta promove un interes den sector primario. Cu e proyecto aki e muchanan ta haya e oportunidad educativo pa siña tocante agricultura sostenibel, usando tecnicanan di agroforestry pa mehora e calidad di e tera y elimina e necesidad di pesticida. Ademas, e proyecto ta aporta na seguridad di alimentacion y autosuficiencia, cu un enfoke ariba scolnan cu por ta limita pa motibonan financiero.
Registracion ta habri pa e scolnan te cu 15 di november. 10 scol lo wordo selecciona segun criterionan specifico, manera entre otro motivacion, tereno disponibel cu acceso di awa y coriente y compromiso di e scolnan.
