Despues cu WEB Aruba y e compania Hulandes Bredenoord na mei ultimo a firma pa un planta temporal di 20 MegaWatt di energia, dia 30 di augustus a yega e momento di su entrega final, e planta temporal aki lo sirbi pa por cumpli cu aumento di demanda di coriente.
WEB y Bredenoord, durante un ceremonia cu a tuma luga ayera mainta a firma e ‘Final Taking Over Certificate’ y a pone e planta nobo den operacion.
For di mei 2023 a conoce un aumento enorme den e demanda di energia y consecuentemente intensificando e uzo WEB su motornan RECIP. E planta ‘mobile’ nobo lo sirbi pa por cumpli cu aumento creciente di demanda pa coriente, pero tambe como back up na momento cu motornan RECIP mester haya nan mantencion obligatorio, of ora e suministro di energia di biento of solo cay diripiente.
Durante e ceremonia, e director di WEB Aruba Alfredo Koolman, chief commercial officer di Bredenoord, Toon Bruining, minister di Labor, Energia y Integracion,Glenbert Croes y CEO di WEB Aruba a elogia tur empleado y contratista envolvi pa a logra ehecuta e proyecto y construi e planta ‘mobile’ den un tempo record di 40 dia for di dia cu a firma.
Koolman a elabora riba e aumento enorme den demanda pa coriente no na Aruba so, pero mundialmente. E bista riba desaroyonan anticipa e proximo añanan ta premira un aumento enorme den e demanda pa energia debi na crecemento den economia, volumen di turismo y cambio climatico. Pa september/october Aruba lo alcansa un demanda peak di 165 pa 170 MW.
Como cu recientemente no a agrega energia renovable na e mix di energia, e motornan na WEB a bin ta haci overtime, creando e reto cu mientras tin mester di produccion, tambe mester saca unidadnan pa e mantencion obligatorio aumentando e carga y presion enormemente riba e personal.
E retonan aki ta exigi accionnan rapido basa riba informacion sano y un team di proyecto enfoca y dedica pa por anticipa y garantisa comunidad di Aruba cu suficiente energia.
Como compania experto di nacion riba energia for di cuminsamento di e aña aki y en bista di e aumento enorme continuo den demanda di energia, WEB a formula su plannan solido riba termino cortico, mediano y largo. Di e forma aki WEB ta keda cumpli cu e demanda creciente di e isla na un manera sostenibel, confiabel, safe y pagabel.
E planta di 20 MW di energia temporal ta forma parti di WEB su plannan di termino cortico. Riba termino mediano, WEB lo instala baterianan pa por almacena energia, pero tambe lo expande planta existente RECIP 3 cu dos motor adicional. Riba termino largo, Aruba como nacion realmente lo tin cu materialisa e expansion renovable di manera urgente, manera nan a informa.
