Cazado di fossiel a haya restonan di un criatura marino enorme, cual tin un parecido asombroso cu e Loch Ness Monster, un criatura mitologico na Escocia.
Investigadonan a descubri e restonan di un elasmosauro enorme, di 70 miyon aña di edad, cual lo a pisa 15 ton y tabata den profundidad di Antartica, segun un relato di National Geographic.
Expertonan ta bisa cu e animal, midiendo 40 pia, ta miembro di e famia di reptiel elasmosaurid, y ta esun mas largo cu a yega di haya.
E investigacion ta contribui evidencia di un ecosistema marino vibrante cu tabata existi net prome cu e extinsion masivo di dinosaurio.
Algun ta kere cu ‘Nessie’, e Loch Ness Monster, ta un plesiosaur di nek largo – manera un elasmosaur – cu di algun forma a logra sobrevivi ora e dinosaurionan a desaparece. E parecido di e cabes y nek di Nessie cu esun di un dinosaurio a pone hende pensa cu e tabata un sauropod cu a sobrevivi. Sauropod tabata dinosaurio terestre cu tabata hala rosea cu aire – mientras e tabata landa, Nessie mester a saca su cabes for di awa pa hala rosea cada cierto seconde.
E mito di Nessie como sauropod por a contribui na e teoria den siglo 19, cu Brachiosaurus tabata pasa mayor parti di su tempo den awa, locual tabata yuda sostene su peso masivo.
Elasmosaurus ta un genus di plesiosaur, cu a biba na Nort America durante e etapa Campanian di e periodo Late Cretaceous, como 80.5 miyon aña atras.
William Zinmeister di Purdue University a descubri un specimen riba Seymour Island durante un expedicion na 1989, pero no tabatin recurso pa excava, pues a informa autoridadnan Argentino di e descubrimento.
E Instituto di Antartica di Argentina a cuminsa excavacion di e fossiel, cual a dura largo pa motibo di clima y problema logistico. Finalmente aña pasa a logra caba e excavacion, otorgando un porcion substancial di skelet. Esaki ta data bek na fin di e Cretaceous – como 30mil aña prome cu extinsion masivo di dinosaurio como 66 miyon aña atras.
Pa un bestia asina grandi biba den lama, tabatin mester di hopi bida marino den e area. E hecho cu e bestianan aki ainda tabata existi na fin di Cretaceous ta evidencia cu mundo acuatico ainda tabata floreciendo net prome cu e extinsion abrupto.
“Hasta na Antartica, tabatin cantidad di elasmosaurus contento”, segun Anne Schulp, paleontologo di Universidad di Utrecht, kende no a participa den e investigacion. “E morfologia diferente di e specie aki tambe ta mustra cu specialiscion ainda tabata tuma luga na e punto aki den existencia di plesiosaurus. “Ta un indicacion definitivo cu na fin di e Cretaceous, plesiosaurus a logra expande nan repertoire alimentario”, el a bisa.
E investigacion ta publica den Cretaceous Research.
