Na luna di april Departamento di Agricultura, Cria y Pesca (DLVV) a haya confirmacion di presencia di Anthonomus tomentosus. Na Papiamento su nomber Ingles lo traduci na Picudo of Snuitkever di Shimarucu.

E picudo por bula y e tin tendencia di acumula na Shimarucu ora cu esaki floria. E ora e embra ta para riba e fruta berde pa asina di biaha pone su webonan den dje. Riba 24 di october di 2018 empleado di DLVV, alerta pa un ex colega kende a tende kehonan di hende, a colecta Shimarucunan mita berde, algun cu buraco y pone riba tera den baki pa mira ki insecto ta pupa for di nan. Riba 6 di november di 2018 el a nota cu ta un tipo di Picudo of Snuitkever ta sali di nan.

Confirmacion di e sorto di Picudo DLVV a logra haya por medio di lasonan di Caribbean Plant Health Directors cu Florida Department of Agriculture and Consumer Services, Division of Plant Industry, Kyle Schnepp. Combatimento di e pester aki ta mustra dificil debi cu aplicacion di insecticida ora cu nan ta riba e Shimarucu ta dificulta cu por come e frutanan. Un insecticida aplicabel ta di e tipo Spinosad. Otro formanan di control ta pa piki tur fruta cu cay for di e mata y mara den saco di plastic y pone 48 ora den solo. Sinembargo Shimarucu hende ta haya riba henter e isla y esunnan den mondi ta keda promove e plaga. DLVV ta asumi cu e plaga lo competi cu e otronan existente manera e Lebelebe y Musca di Fruta di Mediteraneo cu e posibel consecuencia pa e otro animalnan cu sa disfruta di Shimarucu. Den region na 1987 hendenan a establece su presencia na Venezuela.

Den e mesun luna, DLVV a haya confirmacion di presencia di Bacopa monnieri, Water Hyssop na Ingles, den un duiker pariba di Marriott Hotel. Esaki DLVV a haya di Dr. André van Proosdij, autor di “Arnoldo’s Zakflora, Wat in het wild groeit en bloeit op Aruba, Bonaire en Curaçao”. Segun van Proosdij, e ta un mata cu ta crece den region, pero den saliña. Ta conclui cu e Arubiano a cambia e biotoop di tal forma cu awor e Bacopa por establece su mes. Tambe pasobra, algun aña caba, e ta presente na Corsou.

Presencia di ambos especie den naturalesa di Aruba lo aumenta su biodiversidad cu e posibilidad di pusha algun local den extincion, loke lo ta indeseabel. Pa e motibo aki DLVV a informa instancianan pa nota e especienan aki menciona como exoticonan presente na Aruba. Pa mas informacion e-mail DLVV na info@santarosa.aw, of yama 5858102.