Un grupo di hacker a ataca e website di e abogado mas importante di mundo di espectaculo, Allen Grubman, exigiendo $21 miyon y menasando cu revela detaye personal di su clientenan, entre cual ta haya streanan manera Mariah Carey, Elton John, Lady Gaga y Barbra Streisand.
E pagina di Grubman Shire Meiselas & Sacks ta down y e piratanan informatico ta sigura cu nan a horta 756 gigabyte di data, incluyendo contract y email personal, y como prueba pa menasa e bufete, a difundi riba rednan social un supuesto contract di Madonna durante tour ‘Madame X’ cu Live Nation.
Segun reportenan, FBI ta investigando e suceso, mientras e bufete di abogado a bisa cu a notifica su clientenan famoso di e suceso.
E informacion horta ta inclui contract, acuerdo di confidencialidad, direccion di email, number di telefon y corespondencia priva. Un fuente a revela cu ta exigi $21 miyon ‘y e empresa no ta dispuesto pa negocia’. E fuente a agrega cu Grubman tin ‘detaye sensitivo, sobre tur cos, contract di trabou y acuerdonan confidencial di e streanan mas grandi di Hollywood. E bufete ta representa cantantenan manera Barry Manilow, Rod Stewart, Lil Nas X, The Weeknd, U2, Drake, Christina Aguilera, Bruce Springsteen y Nicki Minaj. Tambe actornan Priyanka Chopra, Robert De Niro y Sofía Vergara of deportista LeBron James y Mike Tyson.
Segun informe, e piratanan ta conoci como REvil of Sodinokibi, cu ya na januari a ataca e compania di cambio di divisa Travelex na Merca.
