Diahuebs ultimo, Minister Endy Croes hunto cu directora di Departamento di Enseñansa (DEA), Sra. Anne-Marie Proveyer y directora suplente, Sra. Sheila Maduro a atende un reunion virtual di Vierlandenoverleg.
E reunion aki ta basa riba e ultimo reunion cu a tuma luga januari 2023 na Corsou entre e cuater (4) Minister di Enseñansa di Reino Hulandes, esta Sr. Endy Croes di Aruba, Sr. Robbert Dijkgraaf di Hulanda, Sr. Rodolphe Samuel di Sint Maarten, y Sr. Sithree van Heydoorn di Corsou.
Durante e reunion virtual di Vierlandeoverleg, e cuater (4) Ministerio di Enseñansa di Aruba, Hulanda, Sint Maarten y Corsou a trata diferente topico di interes, entre otro, Strategic Education Alliance, Academic Foundation Year (AFY) y Beca di Reino (Koninkrijksbeurs).
Pa loke ta trata e puntonan cu a trata, tabatin un ekipo di dos persona di Hulanda prepara cu a elabora ampliamente riba e topiconan aki. Durante e ultimo reunion na januari, a palabra cu lo forma un “stuurgroep” di cinco (5) persona pa elabora riba e topiconan cu ta trata entre e cuater (4) isla, cual ta consisti di dos (2) persona di Hulanda, un (1) persona di Aruba, un (1) persona di Sint Maarten y un (1) persona di Corsou, segun un comunicado di gobierno.
Ademas di esaki, a dialoga tocante investigacion laboral (arbeidsonderzoek) cu e universidadnan di e cuater (4) islanan hunto cu Departamento di Labor ta bay haci. Na final di e reunion, a yega na un acuerdo y a firma un slotconclusie digitalmente.
Proximo reunion entre e cuater (4) Ministerionan di Enseñansa di Reino Hulandes lo ta den e luna di juni y na november 2023 nan lo topa otro back fisicamente na Hulanda.
