Ayera mainta durante un conferencia di prensa a wordo firma un acuerdo entre Gobierno di Aruba, Tourism Product Enhancement Fund (TPEF) y e Fundacion Stimami Sterilisami cu e obhetivo di financia e proyecto di sterilisacion di cacho y pushi riba caya.

Manera minister di Turismo y Salud Dangui Oduber a señala, pa hopi aña TPEF ta co-financia conhuntamente cu Aruba Tourism Authority tambe e fundacion aki pa nan por tin fondonan pa yuda atende e problematica grandi aki cu tin riba caya y cu ta conoci for di añanan caba.

“Danki na e fundacion aki cu ta haciendo un excelente trabao den ultimo añanan aki pa sterilisa mas hopi cacho y pushi posibel. Pero esey no ta impresion cu nos kier duna na nos turistanan, cu tin cachonan of pushinan los riba caya y e ta un peliger tambe pa comunidad ora tin gran cantidad di cacho riba caya. P’esey nos ta percura pa financia tipo di proyectonan asina aki cu ta cuadra cu e meta di e fondonan di TPEF,” minister Oduber a bisa.

El a splica tambe riba e importancia di fondonan di TPEF pa e producto turistico, na unda a comenta cu nan ta haci diferente inversion den area di embeyecemento, infrastructura, upgrade e producto Aruba. Entre e diferente proyecto cu a financia caba, tabata esun di e Boardwalk di Malmok caminda turista y local a haya un area sigur pa haci ehercicio. Asina tambe ta haci inversion den seguridad, den conscientisacion, den proyectonan di cultura, di medio ambiente, entre otro.

Den ultimo añanan nan a ripara cu turistanan ta exigi mas balor pa nan placa, e placa cu nan ta inverti pa pasa un temporada di vakantie na Aruba y esey ta e motibo di pakico nan ta inverti continuamente den mehoracion, embeyecemento y upgrade di e producto Aruba.

Igualmente den e partnertship aki entre e tres instancia cu e fondonan disponibel nan ta haci e inversionnan necesario, manera minister Oduber a sigura.

Pa e siguiente periodo dilanti, TPEF tin algun proyecto dilanti cu den proximo dianan nan ta bay ta anunciando. Por ehemplo embeyecemento di Eagle beach Trip, caminda nan ta bay inverti conhuntamente cu sector priva, hotel y condominionan cu ta situa den area aki. Gobierno ta bay haci e inversion y sector priva ta bay percura pa haci e mantencion pa e siguiente añanan dilanti.

Pa otro siman, nan ta bay parlamento pa asina haya aprobacion pa aña 2023, caminda nan ta bay financia un otro proyecto di embeyecemento di Rodgers Beach, cual ta forma parti di e Master Plan Integral di e area di Sero Colorado conhuntamente cu e proyecto di Baby Beach.

Stimami Sterilisami

Pa loke ta trata Stimami Sterilisami, esaki ta un fundacion crea seis aña pasa na unda nan a logra sterilisa 31.000 pushi y cacho na Aruba. “Ta un trabao grandi cu a wordo haci pa purba atende cu e problematica aki, cu sigur ta crea un imagen no desea pa nos turismo,” minister Oduber a sigura.

E programa di sterilisacion aki ta un colaboracion di sector publico conhunto cu sector priva.

E fundacion di Stimami Sterilisami ta ricibi subsidio for di TPEF anualmente, cu excepcion di aña 2021 debi na e pandemia. Nan ta haci hopi bon uso di esaki y ta traha na un manera eficiente, na unda nan ta traha cu 5 diferente veterinarionan di Aruba.

Durante aña 2022 e fundacion a logra sterilisa un total di 3.686 pushi y cacho riba nos isla y nan tin como meta den aña 2023 pa sterilisa alrededor di 5 mil of 6 mil pushi y cacho.

Tocante e proceso pa sterilisacion, segun Ewald Biemans, presidente di e fundacion, a splica cu e persona interesa mester bay na e website di www.stimamisterilisami.com y busca e link di registra, den un par di minuut lo ricibi un contesta di e fundacion cu un number di referencia.

Cu e number aki e doño di e bestia ta bay cerca un di e cinco veterinario asocia na esaki pa traha un afspraak pa asina por hiba e bestia pa e wordo sterilisa.

E doño di e bestia mester paga aproximadamente un 40% di e costo di e servicio, e resto ta wordo financia door di e fundacion y di TPEF.

Minister Oduber a comenta cu e ta kere firmemente cu e manera con personanan ta trata e animalnan ta bisa hopi di Aruba como nacion. A base di programanan asina, den wowo di e bishitantenan ta eleva e imagen di e producto Aruba y ta cumpli cu e vision di Ministerio di Turismo.

“E meta ta pa haci nos comunidad mas consciente riba e problematica aki, mantene e mascotanan den cura ta evita cu nan ta keda reproduci,” el a finalisa.

Segun WildAtHeart Foundation, sterilisacion ta e metodo mas efectivo y compasivo pa controla e poblacion di animal riba caya. Sin intervencion, y cacho hembra y su puppies por resulta den 67mil mas cacho riba caya den apenas seis aña.