Aworaki trabounan ta bay cuminsa den islanan di Reino Hulandes manera Bon Dia Aruba a informa, pa loke ta trata e conferencia di Agricultura cu a tuma luga siman pasa y den cual diabierna ultimo a firma un acuerdo entre Aruba, Bonaire, Curaçao, Sint Maarten, Saba y Sint Eustasius pa loke trata siguridad di alimentacion den paisnan aki.
E proceso aki a cuminsa na october di aña pasa na Corsou na unda tur e isla a reuni y hasta Rijksdienst voor Ondernemend Nederland (RVO) tambe a forma parti di esaki a yuda nan pa establece e plataforma aki na unda e tempo ey Aruba a informa cu nan lo tuma e liderazgo pa organisa e prome Dutch Caribbean Agriculture Conference pa asina ey nan por bini hunto.
Paisnan a haya algun lunanan pa nan prepara kico ta e obstaculonan cu a identifica na Corsou y kico ta e solucionnan cu nan ta bay propone pa yega na un plan di accion.
E conferencia aki a culmina diabierna ultimo cu e firmamento di un Memorandum of Understanding (MoU) pero tambe cu cinco punto cardinal cu nan ta bay traha pa asina fortifica e colaboracion “pero mas cu tur cos, pa adelanta tambe unda nos kier yega pa loke ta trata siguridad di alimentacion.” Minister Ursell Arends a señala.
Den e puntonan aki ta indica con nan ta bay organisa e piscamento den e islanan na unda SABA tin ‘best practices’ cu Aruba por siña for di nan y esey nan ta bay comparti tur e documentonan ey cu Aruba pa por organisa un pesca den un miho forma.
Tambe el a informa cu nan a palabra hunto pa colabora riba un Good Agriculture Practices (GAP) pa tur e productonan local lo yega na un certificacion cu den futuro por bende den hotelnan y cu e oportunidad di por exporta esey pa motibo cu tin un aprobacion di Gobierno di Aruba.
Igualmente nan a acorda di traha hunto pa yega na e financiamentonan necesario pa pusha e sector primario, ademas a acorda pa crea un plataforma di Dutch Caribbean Agriculture Alliance unda nan ta bay fortifica, cu si den futuro gobiernonan ta cambia, e plataforma aki ta keda existi pa asina ey sigui colabora entre e islanan.
Un ultimo punto cu nan a acorda ta pa crea un Data Bank caminda tur e legislacion y best practices ta bay keda comparti entre e seis isla pa di e forma ey, continuamente e islanan por siña for di otro y continuamente por brinda y intercambia informacion, ademas di departamentonan por sigui yuda gobierno yega na e metanan cu nan tin comun pa loke ta trata siguridad di alimentacion.
E conferencia aki tabata bao organisacion di Fundacion Santa Rosa na unda e bishitantenan a tambe haya un tour di loke Aruba caba ta bin haciendo pa area di agricultura. Pa finalisa, minister Arends a menciona cu esaki ta un compromiso di gobierno caminda nan lo sigui duna recursonan pa pusha e industria aki na Aruba.
Durante e conferencia, nan a cera conoci cu diferente fondo cu ta existi na unda e islanan por aplica pa esey “unda nos kier yega si ta cu cada un di e isla ta bay pone fondonan hunto pa crea e Dutch Caribbean Agriculture Alliance pa sigura e fondonan cu por conduci na estudionan pa e seis isla, ademas, el a sigura cu Aruba ta alocando fondonan pa e sector primario pero tambe ta buscando pa inverti den capital humano pa Santa Rosa por haya e impulso aki.
