Diahuebs, durante e Siman di Innovacion Aruba, IMMERSE, Prome Minister den nomber di Gobierno di Aruba, hunto cu Futura, Camara di Comercio (KvK) y Universidad di Aruba, pa prome biaha a firma un Letter of Intent (LOI) pa desaroya e prome plataforma di ‘incubators’ na Aruba. E proyecto yama ABIA, Aruba Business Incubation Agency.
Segun un comunicado di Prome Minister, EvelynWever-Croes, e idea tras di esaki ta pa yuda personanan cu kier cuminsa cu empresanan chikito y mediano na Aruba. Esaki ta un momento historico den colaboracion cu partners riba e plataforma aki cu ta necesario pa yuda entrepreneurs pa ta mas exitoso dunando nan e sosten cu nan tin mester.
Wever-Croes a felicita e stakeholders cu a firma e LOI y a gradici nan pa e colaboracion importante aki. Colaboracion ta un di e metanan importante den e Metanan di Desaroyo Sostenibel (SDGs) di Nacionnan Uni. Y sin e cooperacion di nos partners, e proyecto aki no ta posibel.
“E vision di Gabinete Wever-Croes ta pa sostene e weso di lomba di nos economia cu ta companianan mediano y chikito, y yuda nan caminda cu por pa nan para firme riba pia pa nan por sigui exitosamente y contribui asina tambe na economia di pais Aruba y mi ta sigur cu ABIA lo yuda hopi empresa local desaroya y bira exitoso”, Evelyn Wever-Croes a expresa, finalisando e comunicado.
