Segun director di ImSan, Joel Rajnherc ta bisa Bon Dia Aruba: “Tin un parti cu ta pa mehoracion di e edificio, tin un parti pa Radio Therapy, un parti pa caba e salanan di operacion y un parti pa mehoracion di SEH.
Tin otro parti tambe pa ekipo medico cu mester bin, tur cos den e proyecto hunto cu e logro pa yega na un ‘JCI accreditation’. Kiermen opleiding di personeel y mehoracion di servicio, tur esey ta inclui den e
pakete.”
Ayera den presencia di entre otro Prome Minister, minister di Salubridad y Financia, ImSan a firma locual nan ta considera un trato di financiamento historico pa un inversion di aproximadamente 54 miyon florin. Na 2005, ImSan a wordo estableci anto segun Sr. Rajnherc, for di e momento ey nan a pasa den temponan basta turbulente te cu e momento aki. Na 2009 a dicidi di haci un cambio na kico ta bay bira e destinacion di ImSan unda cu Sr. Rajnherc a haya un oferta cu e ta bisa e no por a rechasa. “For di hopi tempo mi tabata busca un manera pa haci algo bek pa mi comunidad pasobra mi ta bin di San Nicolas. Kisas mi no a nace na San Nicolas pero mi ta sigur cu mi a wordo traha na San Nicolas,” Sr. Rajnherc.
Vision
For di 2012 a forma un team segun Sr. Rajnherc unda a cuminsa na concentra den desaroya e vision cu nan tin pa ImSan. Na 27 di Februari 2012, ImSan hunto cu Baptist Health South Florida
a firma un ‘strategic alliance’ anto for di e momento ey a cuminsa formalisa kico ta e posicion cu ImSan den un comunidad medico pa brinda servicio akinan na Aruba. “Door di hopi analisis a bin na cla cu nos por bira un centro di excelencia pa tratamento oncologico. Door di esey nos a sigui busca e manera con pa yega akinan anto esey no tabata algo facil.” Sr. Rajnherc ta subraya cu nan kier brinda e servicio cu calidad di mas halto posibel anto p’esey hunto cu Baptist, ta buscando e manera pa haya nan JCI Accreditation. Esaki ta un certificacion internacionalmente reconoci cu lo duna ImSan e oportunidad segun Sr. Rajnherc pa busca e ‘medical tourism.’ Ora un seguro di exterior puntra bo via cua protocol bo ta traha anto riba cua nivel bo ta y bo tin un ‘JCI Accreditation’, segun Sr. Rajnherc esaki ta suficiente pa bo no haya ningun pregunta mas. “P’esey cu nos ‘strategic partner’ Baptist ta algo cu nos ta bay logra cual lo bira e prome lugra di hopi mas.”
Apoyo di Ministerio di Salud
Segun Minister Alex Schwengle, AZV tabata tin algun preocupacion tocante e proyecto aki, nan a haci nan tarea anto duna minister bon conseho y haci bon pregunta unda a resulta di haci e trabao mas miho cu nunca. “Despues di cinco a “Despues di cinco aña si, tabata basta largo y apoyo sigur 100% mi a duna na e proyecto. Tur hende a traha cu hopi pasion tin biaha cu gana di yora cu cierto cos no ta logra pero cu perseverancia nos a sigui traha y pusha pa e proyecto y tambe convence un y tur. No solamente politica pero tambe pueblo cu ta necesario pa bin cu e proyecto aki,” Minister Schwengle ta bisa. Den pasado, e tabata un decision di pueblo y politica pa tin dos instancia na Aruba, no solamente hospital pabao di brug, pero tambe ImSan pariba di brug.
Tempo di spera operacion
Minister Schwengle ta splica cu: “Bo por dicidi pa tira 30 miyon na San Nicolas of bo ta haci algo cu ne.
E plan anterior no tabata bon pensa anto e no a logra. E biaha aki porta cu el a dura cinco aña pero nos a bin cu un plan strategico y nos a bisa si cu ImSan lo wordo hiba dilanti den un manera cu e ta complementario cu un hospital.” Casualidad di bida ta segun e mandatario cu aworaki tin tres sala di operacion na ImSan cu ta casi cla anto locual ta e tempo di spera mas grandi aki na Aruba ta operacionnan. E unico manera pa resolve e tempo di spera pa operacion ta pa bin cu mas capacidad di sala di operacion. Na momento cu e tres salanan aki cuminsa opera, cual ta segun e mandatario na 2018, esaki ta bay trece un alivio hopi grandi den pueblo.
Radio Therapy
Tambe ta bay bini cu un Radio Therapy Centrum cual segun Minister Schwengle como dokter mes e ta bisa cu esaki ta haci falta di dje na Aruba. E ganashi social economico pa e pais ta bay ta tremendo segun e mandatario pasobra na e momento aki ta ‘onderbehandel’ e kamer pashentnan. Tin biaha e pashentnan ta asina malo cu asina hopi dolor cu nan no por wordo transporta den exterior. Aworaki ta bay bira posibel cu na momento cu sinembargo nan ta asina zwak cu nan no por bula y mester di Radio Therapy pa alivia nan dolornan, esaki por wordo haci na Aruba mes.
