Diabierna dia 17 di mei ultimo WEB Aruba y Wärtsilä Finland Oy a firma e ‘final take over’ di planta RECIP IV, segun loke WEB a anuncia y cu e firmamento aki, Wärtsilä formalmente a entrega e planta na WEB Aruba.
Operacion di RECIP IV ta conduci na un reduccion drastico di combustibel, na menos emision di gas den medio ambiente y na tarifanan di coriente sostenibel. Ademas, na momento di interupcion di suministro di coriente, e tempo pa recupera ta hopi mas cortico cu den pasado.
E ceremonia di diabierna ultimo a tuma luga den planta di WEB den compania di diferente mandatario, diferente partner di proyecto, empleadonan y contratistanan di e compania di awa y energia y pa e ocasion aki a haci un donacion total di 27.500 florin na diferente instancia educativo, social y deportivo.
WEB Aruba a inicia proyecto RECIP IV na 2019 cu e meta pa bay over 100% riba e tecnologia reciprocal, planta RECIP IV tabata planea pa bay den operacion na 2021, sinembargo a haya un tardanza debi na e pandemia COVID-19 y despues algun defecto inicial a pone cu e entrega formal di e planta por a tuma luga te awor, cu ayudo di WEB su ekipo di proyecto y departamentonan di produccion, mantencion, Warehouse, asuntonan tecnico y contratistanan a logra coregi esakinan.
Construccion di e planta RECIP IV a encera e parti mecanico y electrico, e parti di seguridad, e parti civil y structural, e parti di automatisacion y last but not least, e parti di cumplimento cu tur regulacion. E planta aki, cu hopi componente operacional, ta di tal magnitud cu a tuma mas tempo pa haci e transicion y pone e planta completo den operacion confiabel pa produci energia.
E prome motornan RECIP a bay den operacion na WEB na aña 2006 y cu esey a inicia e caminda pa reduci uso di e Heavy Fuel Oil costoso, e tempo ey e motibo principal pa a introduci e tecnologia di RECIP tabata pa aumenta eficiencia. Na 2013 tabata obvio cu e eficiencia aki no tabata solamente pa reduci gasto, pero mas importante pa baha emision di gas den medio ambiente.
Awendia WEB ta conta cu un produccion di energia, usando un mix di energia di solo y di biento, pero tambe di almacenahe di energia y cu IGMS, e sistema di maneho di energia inteligente. Segun nan ta sigura, cu tur e esfuersonan aki, WEB Aruba a logra baha consumo di Heavy Fuel Oil cu casi 60% desde 2005, sinembargo, e averahe di demanda di coriente di e isla, compara cu aña 2023, a subi cu 10% cual ta hopi halto y esaki por ta debi na aumento di temperatura pero tambe debi na crecemento economico y turistico.
