A firma acuerdo pa pone 100 bari di sushi na costa di Aruba

Ayera mainta Minister di Turismo y Salud Publico, Dangui Oduber a anuncia a firma di e acuerdo entre Gobierno di Aruba, Tourism Product Enhancement Fund (TPEF) y Serlimar relaciona cu e 100 bari di sushi cu ta bay wordo aloca na e costa di Aruba.

Den luna di juni Minister Oduber, hunto cu TPEF, Serlimar y DOW, a anuncia e acuerdo aki na unda TPEF lo haci e compra di 100 bari di sushi cu ta bay wordo poni den 10 area cu ta ser asigna pa DOW pa asina e ploegnan cu tin contract cu TPEF por haci e trabao di mantencion di limpiesa na e areanan aki.

Serlimar ta e compania encarga cu provee e barinan di sushi y instala esakinan. DOW ta e Departamento encarga cu coordinacion di unda e barinan lo wordo ubica.

“E obhetivo ta pa nos mantene e areanan aki limpi na tur momento, un Aruba limpi sigur ta e imagen cu nos kier ofrece na nos localnan, pero sigur na nos bishitantenan, sigur tambe  p’esey e acuerdo di cooperacion aki ta asina importante y ya nos tin e barinan di sushi despues cu nos a hiba e proceso di destaho pa nos yega na e acuerdo cu Serlimar,” Minister Oduber a remarca durante e conferencia di prensa luna pasa.

A traves di un comunicado di prensa Minister Oduber a anuncia ayera e firma oficial di e acuerdo pa cuminsa aloca e 100 barinan di sushi. Segun e mandatario a indica ya caba por cuminsa tuma nota di e basenan di concreet cu a wordo basha rond di e costa di Aruba caminda e barinan lo mester wordo aloca.

E 100 barinan aki ta bay wordo aloca den e 10 areanan caminda e ploegnan di TPEF ta opera. E areanan aki lo ta entre Arashi Beach y Baby Beach. TPEF tin un total di 10 ploeg cu ta mantene nos costa y beachnan limpi.

Minister Oduber a indica cu e barinan aki lo ta facil pa identifica como cu riba nan ta bay tin e logo di TPEF. Tambe e ploegnan aki lo ta responsabel pa piki e sushi di e barinan aki.

TPEF a keda funda na aña 2010 y ta un fondo cu a wordo traha cu e proposito pa

inverti den proyectonan cu ta contribui na e mehoracion di e producto turistico di Aruba.

Minister Oduber a splica cu e obhetivo ta pa Aruba su costanan keda limpi pa asina por brinda un miho producto na e bishitantenan. “Un medio ambiente limpi caminda nos localnan por disfruta di nos beachnan hunto cu nan famia.”