Ayera mainta Minister di Turismo y Salubridad Publico, Dangui Oduber a tene un conferencia di prensa na Museo Arqueologico Nacional Aruba (MANA) na unda a anuncia y a firma un acuerdo pa cuminsa cu e prome fase di renobacion di e edificio di MANA.
Minister Oduber a splica cu Tourism Product Enhancement Fund (TPEF) ta un fondo di presupuesto cu ta haci cu ta haci inversion den embeyecemento di producto y mehoracion di producto Aruba, ta inverti den herencia cultural y ta percura pa mantene nos costanan limpi.
TPEF a bin ta realisando diferente proyecto pa turismo di Aruba, un di e proyectonan aki ta e inversion cu ta bay haci, pa medio di un acuerdo cu ta bay firma, entre TPEF y Museo Arqueologico Nacional Aruba (MANA).
Minister Oduber a remarca cu esaki ta un proyecto cu a wordo presupuesta y cu e firma di e acuerdo trabaonan ta cuminsa oficialmente pa e prome fase di renobacion di e edificio di MANA.
“Nos maneho di turismo ta dirigi pa trece turistanan afluente, diversifica nos turismo, haci inversionnan continuo den producto Aruba y tambe percura pa nos tin un turismo sostenibel. Nos herencianan cultural ta sumamente importante pa nos turismo. Turistanan mas y mas no ta bin Aruba solamente pa nos bunita beachnan, nos clima, siguridad y nos hendenan, sino nan ta bin pa e experiencia total y sigur cultura ta un parti importante den e experiencia cu nos kier brinda na nos turistanan,” el a enfatisa.
“E museo aki ta wordo hopi bon bishita pa nos turistanan y ta pesey ta importante tambe pa nos por haci e inversionnan pa nos por tin un galeria di arte moderno pa comparti e historia di nos herencia y cultura cu nos bishitantenan,” el a agrega.
E proyecto anuncia ta un di e fasenan cu ta bay wordo realisa den e masterplan pa renobacion di parti di e edificio di MANA y segun minister a informa, e prome fase ta renobacion di e dak. Despues ta bay sigui diferente otro fase cu ya caba a ser presupuesta pa e fondo di TPEF. Di e presupuesto y demas fase di e proyecto Minister Oduber no a duna ningun detaye.
El a enfatisa cu Ministerio di Turismo ya caba a compromete su mes tambe pa sigui brinda cooperacion na e embeyecemento y mehoracion di MANA Aruba pa asina por sigui cu facilidad conforme e maneho cu Gobierno di Aruba ta hiba.
Despues cu termina cu e prome fase, cual ta e renobacion di e dak, lo anuncia e inicio y kico ta bira e siguiente fase di e proyecto di renobacion aki di MANA.
Sjeidy Feliciano, presidente di e hunta directiva di TPEF, tambe tabata presenta expresa cu e anuncio aki ta uno importante pa cultura di Aruba.
“Awe sigur ta un dia hopi importante pa cultura di Aruba awe mainta nos ta un edifico masha bunita mes cu hopi balor pa nos tur cu ta biba aki y cu ta yama nos mes Arubiano, un edificio cu no solamente ta conta ken nos ta y di unda nos ta bin, pero tambe tin su balor pa nos bishitantenan,” el a bisa.
Feliciano a indica cu MANA semper a conta cu e contribucion di TPEF pa diferente proyecto durante e ultimo añanan pa renoba y embeyece e edificio. TPEF ta enfoca ariba embeyecimento di e producto turistico Aruba riba diferente area y aworaki a toca turno na e area di cultura.
El a sigui splica cu e proyecto aki ta enfoca ariba arte moderno y contemporaneo cu ta contribui na e artistanan y e parti di industria creativo cu ta trece hopi beneficio no solamente pa hendenan local, pero tambe turismo.
“Manera nos sa mas y mas turista ta busca e aspecto autentico di e pais cu nan ta bishita pa asina siña y aprecia e historia y cultura di e pais. Aruba sigur no ta keda atras,” el a señala.
Raul Gei, di Monumenten Bureau Aruba, tambe a hiba algun palabra y el a splica cu e pa e proyecto aki di mantencion di dak di MANA, unda cu lo bin e Modern Art Gallery (MAG) y Permanent Exhibicion Area (PEA), a firma cu e contratista Abeso.
Monumenten Bureau Aruba su tarea ta pa cuida y mantene e monumentonan na Aruba pa asina nan no bay perdi. Gei a remarca cu MANA su edificio ta constantemente den mantencion y cu hopi sacrificio nan ta lucha pa mantene e compleho importante aki.
“Aunke MAG y PEA no ta historico, nan ta forma parti moderno di e Museo Arqueologico Nacional Aruba y tin un balor pa comunidad di Aruba,” Gei a enfatisa.
