Durante un conferencia di prensa di Gobierno di Aruba ayera mainta Prome Minister, Evelyn Wever-Croes, hunto cu Minister Xiomara Madura a anuncia e finalisacion di e prome fase di e trabaonan di renobacion di Parke Ayo.

Prome Minister a splica cu e proyecto aki a cuminsa durante pandemia ora cu mundo completo a realisa cu pa sali for di pandemia y keda biba na un forma mas saludabel, tin mester di mas actividadnan pa por haci pafo di cas.

Asina gobierno a crea e comision Aruba Amenities cu hunto cu varios departamento di gobierno y instancianan semi-gubernamental a traha riba algun proyecto y Parke Ayo ta un di nan.

El a sigui splica cu un aña y mey pasa a cuminsa cu e trabaonan pa restaura Parke Ayo. E comision a haci un trabao inicial di caracter di urgencia pa mitiga e problemanan principal y despues a cuminsa haci e planificacion y trabao pa renoba e diferente partinan di e parke.

E mandatario a indica cu fase 1 a encera diferente aspecto. A cuminsa cu renobacion di e caminda di cana, a pone rails di metal pa seguridad ariba e ruta cu e hendenan ta cana, renoba e dak di e cabananan, a traha un brug di palo na unda e rooi ta drenta den Ayo, a pinta e tralinan cu tin pa proteha e cuebanan cu dibuhonan di indjan y a logra traha dos borchi nobo pa e parke.

DOW tambe ta forma parti di e comision Aruba Amenities y director di DOW, Marlon Croes, a splica tambe cu e trabaonan tabata intensivo y e comision tabata reuni pa bin cu diferente alternativa ariba kico mester haci y cu e tiki placa cu nan tabatin disponibel, a drecha e cura, cual tabata e trabao mas grandi.

El a remarca cu retonan mas grandi ta cu parkeerplaats ta limita y den fase 2 nan ta bay enfoca ariba con por amplia e capacidad pa por carga mas bishitante. Den fase dos tambe, el a agrega, nan ta bay dedica mas tempo na e parti di flora den e area aki.

Presidente di e comision Aruba Amenities, Aldrick Croes, a splica cu durante e prome fase aki tabatin hopi intercambio cu diferente instancia tocante con por haci e trabaonan miho y na un manera sostenibel.

“Miembronan di e comision aki ta hiba debatenan intensivo, intelectual y pasional pa asina por yega na e miho conclusionnan pa cada fase pa renoba y tambe dedica atencion na innovacion na cada un di e patrimonionan,” el a remarca.

El a indica cu ya nan ta preparando pa fase 2 y esaki ta bay encera trece tecnologia pa innova e experiencia di cada bishitante.

Croes a sigui splica cu nan ta trahando cu un compania specialisa cu a haci un investigacion na e sitio y tambe den forma di un town hall pa scucha e comunidad y dun’e su participacion pa asina nan por a yega na identifica e puntonan mas importante di e experiencia den e parke y haci esaki den un forma interpretativo.

Cu un ruta interpretativo, el a enfatisa, e persona cu bishita e parke lo por usa su telefon y cu QR code e ta bay haya informacion na cada punto importante riba su ruta di cana.

Esaki, el a resalta, ta agrega un balor educativo. “E balor educativo den e experiencia ta bay wordo aumenta y e ta bay conoce un aspecto caminda e contenido di tanto e parti historico y indigena di e luga, pero tambe e contenido geologico. E historia, e edad di e piedranan, informacion hopi valioso. Tambe ademas informacion botanico di e matanan cu tin y un poco di e parhanan cu ta bishita Ayo,” Croes a indica.

Por ultimo el a menciona cu fase tres ta bay encera un centro di informacion pa e bishitantenan.