Cantante y compositor Spaño, Pau Dones, vocalista di e grupo Jarabe de Palo, a muri ayera na Barcelona cu 53 aña di edad como consecuencia di cancer, cu a diagnostica na 2015, contra cual el a bataya desde e tempo ey, segun su famia a informa.
Famia Dones Cirera a informa di fayecimento di e musico y a mustra gradici na e team medico y personal di hospital unda el a ricibi tratamento pa ‘tur nan trabou y dedicacion durante tur e tempo aki’. Ademas a pidi pa respet y intimidad na e ‘momentonan asina dificil’.
Dones nunca a oculta su enfermedad, el a papia abiertamente di su lucha contra dje y a participa den varios concierto na beneficio di investigacion contra cancer, prome y despues di retira di escenario na januari 2019.
Sinembargo, Dones a anuncia na april, den pleno pandemia, su regreso na musica despues di mas di un aña di retiro, y dia 27 di mei Jarabe de Palo a publica e video di nan single ‘Eso que tu me das’, parti di e album ‘Tragas o escupes’, den cual e no a oculta e desgaste fisico di su bataya contra e malesa.
Dones a bisa cu e cantica ta un forma pa gradici e generosidad cu el a ricibi, ‘cu semper ta hopi mas di locual realmente mi merece’.
Na maart el a aparece den un video cantando riba balcon di su cas na Barcelona, den homenahe na personal sanitario luchando contra coronavirus. Na april el a lansa un avance di ‘Vuelvo’, unda el a expresa e necesidad pa bolbe mundo di musica.
Fuente di e discografica a indica cu e despedida di Pau Dones lo ser haci ‘den e mas estricto intimidad’ y cu no lo celebra un funeral.
