Ayera den oranan di mainta dilanti oficina di Ministerio Publico, parlamentario di partido AVP Arthur Dowers, acompaña pa su colega Mike de Meza mediante un entrevista na otro medio di comunicacion a informa cu a bay entrega un keho penal contra di e ex-minister plenipotenciario Guillfred Besaril.
Segun Dowers a indica cu for di luna di mei di 2021, Prome Minister Evelyn Wever Croes a wordo informa di e caso di Minister Besaril y el a confirma despues cu tin un investigacion andando y cu el a ricibi informacion di persona di Arubahuis riba decisionnan ilegal cu Besaril a tuma.
“Loke ta bisto den henter e caso aki, Prome Minister Evelyn simplemente no kier entrega keho contra ex-Minister Besaril y te ainda no ta sigur cu el a presenta resultado di e investigacion di CAD na Ministerio Publico pa inicia c’un procedura penal y cu Prome Minister e tempo ey tabata na haltura di e bagamunderia cu Besaril tabata cometiendo den su posicion di minister plenipotenciario caminda el a haci mal uso di fondonan di Arubahuis.”
El a compara e situacion cu a tuma luga na aña 2021 cu ora na e tempo ey, parlamentario Alan Howell a bira sospechoso den un caso penal y Prome Minister a dicidi di entrega retiro. Howell, ken prome tabata fungi como polis no por a bay bek na su trabou debi cu a wordo suspendi pero Besaril si ta keda den su funcion igualmente como polis y ta sigui cobra “overbruggingstoelage”, manera Prome Minister a sigura den un conferencia di prensa na october di aña pasa.
Nan ta cuestiona e hecho cu “te dia di awe ainda Prome Minister no a entrega e caso na Ministerio Publico pa wordo investiga legalmente y aki nos ta papia di cosnan serio, acusacionnan cu Ministerio Publico a bin ta uzando pa investiga y persigui otro politiconan cu no ta di MEP. For di e rapport di CAD cu a investiga e caso di Besaril, no por mira acusacionnan serio manera ‘verduistering in dienstbetrekking, valsheid in geschrifte en oplichting’ y tambe ‘witwassen’ acusacionnan cu Ministerio Publico a yega di usa contra otro politiconan sin prueba concreto pa persigui e politiconan aki,” el a sigura.
E echonan
Despues cu Prome Minister Evelyn Wever-Croes a haya un e-mail anonimo unda e no por a actua na e momento ey debi cu no tabatin echonan concreto, despues el a haya un otro e-mail di ekipo di Arubahuis na Hulanda splicando cu nan tabatin sospecho fuerte cu ex-Minister Guillfred Besaril conscientemente no tabata actua a base di ley di contabilidad.
Den esaki, no solamente el usa e credit card cu ta propiedad di pais Aruba, tambe el a huur un propiedad na Hulanda unda a drecha hardin y cura di e cas, a pone un sistema di alarma pa 10.900 euro y a haci reparacionnan den e mesun cas na un costo di 21.000 euro na aña 2020.
El a haci un biahe pa bin Aruba cu no a wordo aproba pa Conseho di Minister na december di 2020 unda el a paga na hotel Divi Village 1.300 euro, tambe su yiu cu a caba di nace a wordo beneficia cu placa di pueblo di Aruba ora el a drecha ful e camber di e integrante nobo di e famia. Su casa tambe a biaha riba VIP business class na momento cu Aruba tabata pasando un mal momento debi na pandemia di Covid-19 unda mas di 4.000 hende a perde nan trabou y empleadonan publico mester a entrega 12.6% di nan salario pa yuda esunnan cu mas tabatin mester di dje.
Esaki ta algun ehemplo chikito di hopi gastonan cu ex-Minister Besaril a haci segun e investigacion di Centrale Accountants Dienst (CAD) cu na opinion di pueblo, e ta un burla y un insulto pa loke ta trata integridad.
Segun informacion, ex-Minister Besaril pa persigui e penalmente pa motibo cu ya caba Gobierno di Aruba a yega na un areglo cu ex-Minister pa paga e suma di loke supuestamente a bay fout, cu el a malversa.
Prome Minister a yega di informa na redactor di informa Bon Dia Aruba cu “Centrale Accountants Dienst a splica varios suma el a paga caba”.
