Manera ta bon conoci Frente Social Progresivo ( FSP)ta boga pa legalisa Cannabis medisinal aki na Boneiro. Presidente di Frente Social Progresivo Renny Winklaar y lider politico di nos organisacion politico a entrega un carta cu e peticion aki na Secretario di estado Knops pa legalisa e yerba pa Boneiro tambe mescos cu na Hulanda ta e caso.
Despues di a profundisa mas den e materia a yega na e conclusion cu Cannabis recreacional tambe lo tin un balor inmenso pa nos isla.
E pandemia di Covid 19 tin mundo den su gara pa basta tempo , e peliger cu e virus aki a causa ta grandi , e daño economico y social ta inmenso.
Hopi ta e islanan den Caribe cu ta depende di e industria di turismo.
Tur ku di un otro forma ta biba di turismo a , ta i lo sinti un perdida di entrada nunka visto den historia di e sector aki . No tin un bista ki dia i kon e industria aki lo rekuperá i kon e turismo nobo aki lo ta .
Un biaha mas por a sinti con fragil un economia basa riba un solo pila economico ta.
E crisis cu Venezuela ta den tambe tin su efecto riba islanan ABC .
PdVSA ta den problema serio i esaki tin su efecto riba Bopec cu logicamente tin su impacto negativo pa Boneiro.
Pues e industria di turismo i petroli ta bou di presion y ta den crisis , negoshi ta bay malo , no tin ganashi y esaki na su turno tardi o tempran lo nifica perdida di cupo di trabou y impuesto pa gobierno.
Hopi ta esunnan cu a papia di diversificacion di nos economia , pa un o otro motibo ainda esaki no a cristalisa.
Boneiro por sigui ehempel di hopi pais na mundo cu a legalisa Cannabis y mira con esaki a beneficia e comunidad positivamente.
Cannabis ta un mata cu hopi potencial esaki por crea un sector economico nobo , cu tin un futuro briyante su dilanti.
FSP ta convenci cu ta ora pa cana e trayecto pa legalisa Marihuana , no tin discusion pa cu e balor medicinal di e yerba , esaki pa hopi tempo ta cientificamente proba caba .
Awo ta ora pa bay pa esun recreativo ku tin hopi beneficio pa e productornan y tambe comercio. Pues mester planta y exporta e productonan deriva di e mata , logicamente tanto consumo local y
exportacion ta bay controla pa instancianan oficial. Aki nan ” FSP ta Aprecia cu tin mas organisacion (Fundacion) a lanta pa hiba e lucha pa legalisa Cannabis den su totalidad.”
Un estudio oficial na Aruba ta bisa cu cannabis medicinal por crece e Pais su economia cu 10 porciento. Rond mundo tin paisnan cu a mira nan economia crece despues di legalisacion di produccion y consumo di e mata aki.
FSP ta di opinion cu Marihuana ta E remedi pa hende pero tambe pa nos economia Boneriano. Awo ta ora pa exigi legalisacion di Marihuana pa Boneiro tambe i no pa Hulanda so. No por sigui pensa malo y anticua y laga e oportunidad di oro aki bay perdi .
E perdida di entrada ocasiona pa e crisis petroli y e pandemia di e virus di corona ta un realidad cu Boneiro ta experenciando.
Nos por sigui bringa , lucha y pretende cu conceptonan economico cu nos conoce caba o busca moda di bay cu tempo y acepta e bondad medicinal y economico di cannabis.
FSP lo para fuerte pa e trayecto di legalisacion di cannabis recreativo cu ta canando na Hulanda ta aplicabel pa Boneiro tambe.
Nos tin tera , solo i awa , esaki ta e condicionnan primordial pa produccion di Marihuana di bon calidad , pues ta ora pa lanta i brasa e oportunidad di oro aki.
Tur shimarucu ta hecho , basta cu nos libera nos mente di tabu nan , hopi biaha politicamente o economicamente fabrica , y mira e realidad y potencial medicinal y economico cu cannabis ta representa.
Tanto Aruba como Corsou ta trahando riba e producto y sector nobo aki den Caribe Hulandes , pues Boneiro tin cu move pa atrobe nos keda tras y yora malay .
