27 di september ultimo, Controleteam Multidisciplinario a eherce un control riba supermercadonan den area di San Nicolas pa loke ta trata prijsnan di comestibel.
Durante e control rutinario a eherce control riba cumplimento cu prijsnan maximo stipula pa gobierno riba productonan di canasta basico, indicacion di prijs, permiso di negoshi, benta di alcohol, higiena, fecha di vencemento di productonan y carchi di salud.
A constata cu algun supermercado no ta cumpli cu reglanan riba carchi di salud, higiena y productonan venci, pa cual lo eherce un hercontrole.
Tambe, dia 13 di september 2023 e Controleteam Multidisciplinario (controladornan di Departamento di Asuntonan Economico y Departamento di Salud publico, acompaña pa agentenan policial di KPA) a eherce un control riba supermercadonan den area di Santa Cruz.
Igualmente e dia aki a controla diferente supermercadonan riba cumplimento cu e prijsnan maximo stipula pa gobierno riba productonan di canasta basico, indicacion di prijs, permiso di negoshi, benta di alcohol, higiena, fecha di vencemento di productonan y carchi di salud. Na mes momento a atende cu supermercadonan riba imcumplimento cu e prijsnan maximo stipula pa gobierno y productonan cu nan fecha a vence.
E lista completo di productonan di canasta basico cu nan prijs maximo vigente ta disponibel riba e website www.deaci.aw y tambe riba e app ‘Control di Prijs’.
Cada 2 siman departamento di Asunto Economico ta publica e macuto di compras. Consumidor por evalua prijs di diferente producto na varios supermercado den e 3 region Noord, Oranjestad y San Nicolas.
Un recordatorio tambe riba e publicacion semanal di “Macuto di Compras’ cual ta compara prijs di 40+ producto den supermercadonan den diferente districto.
Pa cualkier keho of iregularidad por contact Departamento Asunto Economico Deaci riba Facebook of via email: info@deaci.aw.
