Siman pasa College Aruba financieel toezicht (CAft) a bishita Dr. Horacio E. Oduber Hospital y AZV. Riba iniciativa di CAft Hospital a start cu un analisis y stipula un ‘timeline’ pa tin un miho bista ki ora HOH lo no por carga e gastonan di e cuido actual mas y ki consecuencia esey tin pa Hospital, Aruba y Gobierno. E analisis ta consisti di un version cu y sin cortamento den cuido. Den ambos caso Hospital tin retonan grandi financiero. E lo keda na gobierno pa dicidi kico nan ta spera di Hospital y cuanto placa nan kier pone den presupuesto y/of duna diparti e turismo lucrativo pa e cuido en general, specificamente Hospital. CAft a duna di conoce cu lo sigui di cerca e escogencianan di gobierno y AZV y cu tin menos comprension di nan banda si Hospital sigui ta bou presion.
Durante e bishita, HOH a duna entre otro bista den e situacion critico financiero di Hospital door di varios motibo. Tin diferente motibo pa esaki y un di nan cu durante añanan no tabatin acuerdo riba un produccion maximo den cuido y ademas e maneho insuficiente di Hospital pa stop di brinda cuido ora yega e budget maximo cu Hospital ta haya for di AZV.
Tabatin impactonan intensivo financiero manera e atake cibernetico na 2019 (±2 miyon), e retonan di e proyecto di (re)construccion y dañonan cu tabatin despues di entrega, e cobransanan di utilidad cu ta dos biaha mas halto door di e expansion di Hospital y e reduccion di gasto di gobierno riba e construccion unda a kita solucionnan sostenibel. Ademas di esaki tabatin e candela na aña 2020 cu tabatin envolvi hopi gasto di material y entrada perdi (total ±2.6 miyon) door di cierto cuido cu mester a bay pa ImSan.
Despues mundo a conoce e crisis di Covid-19 y esaki a sacudi Hospital y mester a pospone of stop algun cuido temporalmente pa yuda pashentnan cu Covid-19. Actualmente esaki a yega mas o menos 4.6 miyon. E gastonan di Covid-19 den 2020 a wordo cubri door di AZV.
Pa tin un Hospital financieramente saludabel mester di un aporte inicial di 33 miyon. Banda di esaki ta necesario pa tin un aumento structural di 15 miyon riba e budget actual di AZV di 192 miyon. Den e suma aki actualmente tin un cortamento di 5.5% (10.6 miyon) door di e crisis di Covid-19 y como parti di e acuerdonan cu a cera den e landspakket.
E cortamento di e 5.5% ta haci cu cierto cuidonan no lo por wordo ofreci mas, adapta e cantidad, enfoka riba e lista di personal, e condicionnan secundario y adapta compensacionnan extraordinario pa dokternan.
Door di finansas insuficiente pa busca mas personal ta haci cu tin mas tempo di espera na cierto policlinicanan door di Covid-19 y tambe falta di personal.
No por lubida cu pa loke ta pashentnan indocumenta actualmente tin mas cu 10 miyon riba caya. Esaki ta pone hopi presion riba Hospital. A pidi ministerio di husticia pa tuma e gastonan aki pero te aworaki no a duna resultado.
E periodo benidero lo sigui traha riba e rol di Hospital den nos region cu Dutch Caribbean Healthcare Alliance (DCHA). Hospital ta desea di tin un rol importante den region pero manteniendo su autonomia y igual cu otro hospitalnan den region. Esaki actualmente no ta bayendo manera HOH ta desea.
