Relaciona cu un investigacion interno andando pa garantisa integridad di e departamento y su empleadonan, Guarda nos Costa a dicidi di prohibi entrada na 5 di su trahadonan. Pa duna espacio na un investigacion imparcial y sin metemento, a opta pa wanta e grupo aki na cas pa asina e ekipo di investigado por realisa nan trabao trankil.
Ultimo tempo Guarda nos Costa ta hopi mas ocupa cu normal, no solamente pasobra tin cantidad di detencionnan relaciona cu stranheronan cu ta keda Aruba di vakantie mas largo cu ta permiti, cu ta traha sin permiso of cu a yega Aruba sin pasa Migracion, pero tambe cu e procedura pa por deporta nan via vuelonan humanitario ta tuma bastante trabao. Esey banda di e hecho cu ta renobando y ampliando e facilidadnan mientras cu tin stranheronan deteni.
Y unda tin hopi trabao ta tuma luga, por comete erornan. Pero ora sinti cu no ta un simpel eror sino por tin algo mas su tras, ta rekeri un investigacion profundo pa por sigura cu e departamento ta traha a base di normanan di integridad y mesun cos ta spera di cada un empleado trahando eyden. Ainda no tin ningun indicacion cu no ta asina, pero pa evita cu e percepcion ey por ta biba den comunidad, ta haci un investigacion toch pa subraya cu tur hende eyden ta di confia.
E medida ta encera un “toegang ontzegging” cu ta nifica cu e empleadonan no ta suspendi, sino cu nan no tin acceso na ningun edificio of vehiculonan di Guarda nos Costa. Ta un forma pa por baha e tension interno y investiga sin ningun sorto di presion. Directiva di Guarda nos Costa ta spera di por keda cla cu e investigacion pronto.
