(LaVanguardia) – E ley cu ta permiti e circulacion di bitcoin como moneda na El Salvador hunto cu dollar Mericano a drenta na vigor ayera diamars, cu loke e pais aki ta bira e prome na mundo cu ta duna e paso entre e rechaso di e poblacion.
E ley di Bitcoin, aproba na juni pa mayoria oficialista na Asamblea Legislativo y aliadonan, ta indica cu “tur agente economico lo mester acepta bitcoin como forma di pago ora ta ofreci pa esun cu ta haya un bien of servicio”.
Esaki ta nifica cu su uso ta obligatorio aunke e presidente Nayib Bukele a señala cu lo keda como un opcion pa e Salvadoreñonan.
Ademas, e normativa ta señala cu “e tipo di cambio entre bitcoin y dollar di Merca, lo ta estableci libremente pa e mercado”.
For di ayera Salvadoreñonan lo por a haci uso di ATM, esun cu tin bitcoin lo por retira dollar cash. Asina mes, lo por descarga e cartera electronico cu Gobierno a haci impulso y ta yama Chivo Wallet.
E personanan cu lo dicidi di instala riba nan smartphone e aplicacion lo ricibi un bono di bitcoin ekivalente pa 30 dollar, sin cu nan lo por cambia na dollar.
E presidente Salvadoreño a promove e uso di bitcoin como un medida pa elimina e pago di comision pa envio di remesa for di Merca, cu economia di El Salvador ta sostene y cu ta beneficia casi 1.63 miyon Salvadoreño.
Un total di 471.633 hogar ta ricibi e divisa aki, di e cual 13.530 ta den pobresa extremo y 68.874 den pobresa relativo, segun fuentenan oficial.
Di acuerdo cu e mandatario, ta 400 miyon di loke Salvadoreñonan ta paga na stranhero cada aña pa manda remesa,cu na 2020 a suma mas di 5.900 miyon.
Centenares di Salvadoreño, den nan mayoria hobennan, den ultimo dia a manifesta contra e implementacion di bitcoin como moneda di cambio y a pidi e eliminacion di e ley cu ta permiti su uso.
