Reunion riba CARMABI a bira un discusion ken ta responsabel pa e planta di RWZI

E intencion di Gobierno tabata pa presenta e rapport di CARMABI na Parlamento hunto cu su plan di accion y cuadro financiero pero no a haya e oportunidad pa motibo cu el a lek. Y motibo pakico cu kier a presenta un proyecto total tabata netamente pa evita locual a sucede esta cu crea panico y haci politica.

Asina Prome Minister Evelyn Wever Croes a bisa durante e reunion publico riba e estudio riba e calidad di rif di Aruba. E declaracion di mr. Wever Croes ta diferencia cu e declaracion di Minister di Naturalesa y tambe Director di Direccion di Naturalesa y Medioambiente cu ambos a bisa cu a publica e rapport.

Sinembargo, un cos cu a bira hopi cla cu CARMABI a señala particularmente e problema di RWZI cu tin impacto riba calidad di awa di lama y e bida di coral. Aunke cu e reunion tabata riba e rapport, mayoria di e discusion a bay riba e planta di purificacion di awa di riool na Bubali. Hopi di e preguntanan tabata riba e aspecto financiero, y tambe e falta di diferente gobernacion pa a keda sin inverti den e planta cu a yega na un capacidad na 1995 caba.

E iniciativa pa e rapport tabata di DNM cu a paga 159 mil florin pa e investigacion aki cu a keda presenta na Prome Minister Wever Croes Evelyn, kende dia 20 di Januari 2021 a pidi pa e presentacion di rapport. “E no ta devastador riba tur area. Nos awanan tin area cu ta bon pa pisca (red. CARMABI a señala cu tin sobrepesca y a desconseha e permiso pa spearfishing). E coralnan ta ‘redelijk.’ Pa loke ta bacteria, ta punto di preocupacion. Mi pregunta na nan si nos tabata laat. CARMABI a bisa cu no ta laat sino cu mester actua.” Y asina hunto cu Minister di Finanzas, Minister di Turismo y Salud, Minister di Husticia, y tambe Minister di Sector Primario e tempo ey pa forma un comision cu mester a bin cu solucion a termino corto, mediano y largo. “A dicidi na Februari pa no publica e rapport pa no pasa locual a sucede recientemente. Publica e rapport sin un bon splicacion y sin un plan pa atende cune, con ta atende cu e retonan señala den e rapport, ta netamente locual oposicion a haci cu e rapport den e ultimo dianan. Crea panico sin cu tabata necesario. Lamentablemente e la leak y a haci drama cune cu a causa daño irreparable.”

Violacion derecho riba informacion

E reunion publico a dura henter dia, y a termina te den oranan di anochi. E prome Parlamentario cu a hiba palabra tabata dr. Ryçond Santos do Nascimento kende a cataloga e problema di RWZI e ‘Bubali-gate’ y a bisa cu e ta viola autonomia y derecho riba informacion y a pone salud di hende na peliger. Do Nascimento a ilustra publicacionnan con a señala con peligroso e awa den e plas a bira y su efecto pa calidad di lama. Como tal, Gobierno mester a haci un Evaluacion di Impacto di Salud, como herment pa desaroya un maneho di desperdicio likido cu “realmente ta pone e ser humano central.” E Parlamentario a mustra cu e rapport di CARMABI ta un motibo mas, ya cu e investigacion.

Minister Dangui Oduber a acusa e Parlamentario di AVP y di oposicion di kier destrui imagen di Aruba cu por afecta turismo, djis pa motibonan politico. Motibo ta e interpretacion unda a CARMABI saca e muestranan di awa cu a mustra cu tin bacteria cu por tin efecto pa salud di hende. Segun Ministernan Ursell Arends y Minister Dangui Oduber, e muestranan ta di e plas y cu calidad di lama ta sigur pa hende landa.

E discusion den Parlamento a enfoca hopi riba ken tabatin e responsabilidad pa a ignora e problema di RWZI y a usa particularmente e programanan di partido di oposicion, unda Accion21 y MAS a menciona e problema aki, contrario na AVP.

Miembro di fraccion di MAS sra. Aquanette Gunn a bisa cu tur Gobierno di Aruba durante curso di tempo, a enfoca riba desaroyo economico, pero no a para keto riba capacidad di RWZI. “Pasobra crecemento economia a trece crecemento substancial di awa cu mester procesa/ Ningun Gobierno tabata sa di a hiba un maneho di mantecion structural y p’esey nos ta na e cruzada aki.”

El a haci pregunta riba e asina yama rioolheffing, manera cu DOW a sugeri. Y aki Prome Minister Evelyn Wever Croes a bisa cu ningun Gobierno a tuma e decision politico pero cu ta considera pa haci esaki den reformanan fiscal.

Elimina kambernan di hotel cu mester bin ainda

Sr. Miguel Mansur di Accion21 kier tabata sa ki ora Minister di Naturalesa a haya sa di e contenido di e rapport di CARMABI y tabata kier sa si e tabata un maneho prudente pa WEB inverti den coneccion pa LNG enbez di a tuma e responsabilidad di RWZI cu ta impacta turismo di Aruba y calidad di lama. Y mirando e hecho cu RWZI no tin e capacidad pa procesa tur e awanan di riool y cu tin 2500 kamber ainda pa bin, Mansur tabata kier sa kico a haci pa para e construccion di esakinan. Riba e pregunta aki, Prome Minister Evelyn Wever Croes a bisa cu ta midi cada uno pa mira e evaluacion di risico. “Nos tambe nos ta sinti cu 2500 ta hopi, particularmente e parti pabou. A logra baha di 10 mil. E proceso no a caba ainda.”

Mansur tabata kier sa si tin e posibilidad pa responde na e sugerencia di Fundacion Parke Nacional Aruba pa converti 90 porciento di e isla den Parke Nacional pa asina salvaguardia e naturalesa cu tin. Minister Arends a splica cu e promedio di Caribe ta 30 porciento di teritorio dedica na preservacion y na Aruba e ta na 21 porciento. Como tal, Aruba ta nuebe porciento bou di e average di Caribe. Ideal lo ta pa henter e area rond Aruba bira parke marino, pero na e momentonan aki Aruba ta mara na e ROP y e ROPV cu ta conta te cu 2029.

Segun Mansur, e 60 miyon cu mester pa RWZI ta 5 porciento di presupuesto di Pais Aruba y mirando e embergadura ta kere cu mester por saca e fondonan mas pronto posibel y no warda te 2026 pa yega na e solucion

Lider di fraccion di MAS drs. Marisol Lopez Tromp a bisa cu ora cu e tabata Minister nunca el a haya e rapport di CARMABI, pero cu e tabata conoce e retonan di RWZI. Mester bisa cu durante e reunion a bin henter un discusion cua tabata e responsabilidad di drs. Lopez Tromp pa a aloca fondonan pa RWZI ora cu e tabata Minister pa e periodo di ocho luna. “E tema no ta nobo. Semper mi a bisa cu si no actua awor, e lo por tin consecuencia devastador.” Na fin di dia a bin henter un discusion riba e papel di sra. Lopez Tromp, kende a bisa cu net e como Minister a para pa naturalesa y medio ambiente pero cu ta pa e motibo ey a core cune. Prome Minister a argumenta cu e motibo cu Marisol Lopez Tromp mester a bay tabata pasobra su fraccion di POR no tabata kier sigui sosten’e.

Mocion y spearfishing

Di parti di fraccion di MEP y RAIZ a bin dilanti cu mester tene cuenta cu rapport CARMABI y en particular cu RWZI, pero mustrando cu esaki ta un problema bieu. E fraccionnan a mustra confianza cu Gobierno lo atende cu e problema na un forma serio.

Tabatin dos mocion, uno di AVP, cu a pidi pa e Evaluacion di Riesgo pa Salud di nos lama, cu no a haya sosten di coalicion, mientras cu e mocion entrega pa MEP y RAIZ cu ta instrui Gobierno pa percura cu tin fondonan pa mantene e plantanan di RWZI den futuro a keda acepta.

Minister Ursell Arends a bisa na final cu a pesar di tur cos, e ta contento cu awor tur hende na Aruba sa con importante e planta di RWZI ta. Pa loke ta su pensamento riba spearfishing, e Minister a bisa cu e permisonan duna ta caduca dia 26 di Mei, y mirando cu CARMABI a desconseha uso di spearfishing, lo evalua kico ta bay pasa, basa riba necesidad di hende pa por abastece nan mes di cuminda, pero tambe si tin posibilidad pa cumpli cu control.