Dia 4 di mei ultimo recherche di San Nicolas a detene un persona di 17 aña relaciona cu un caso di tiramento na Betonicastraat na Pos Chiquito.
Ta asina cu Cuerpo Policial ayera a informa cu recientemente departamento di Recherche San Nicolas a haci un detencion den e caso di tiramento cu a tuma luga ariba 16 december 2023 dilanti Tio Pepe Bar & Restaurant situa na Betonicastraat na Pos Chiquito.
Segun e comunicado ta indica, e team di recherche San Nicolas a traha incansablemente pa pone man riba e sospechoso(nan) den e caso en cuestion y dia 4 mei ultimo recherche a detene e sospechoso masculino di inicialnan N.W. di 17 aña di edad.
Cuerpo di Polis tambe a señala cu nan no ta descarta cu lo tin mas detencion den e caso aki.
Pa loke ta trata e caso, tabata diasabra 16 december 2023 pa 2:58 di marduga na unda central di polis a haya un notificacion di Alarma Central cu lo tabatin un caso di tiramento na altura di Tio Pepe Bar & Restaurant cu ta situa na Betonicastraat na Pos Chiquito.
Na e momento ey, patruya a yega cu maximo urgencia na e sitio y ta haya cu un auto di marca Mini Cooper destrui, pero nan no ta topa cu ni un persona.
Patruya di San Nicolas a bay haci control den area y den cercania a bin topa cu huls.
Departamento di recherche di San Nicolas como tambe polis tecnico a presenta na e sitio pa asina haci nan investigacion.
Un rato despues di e dia ey, central di polis a ser notifica cu un persona lo a yega na hospital cu herida di bala den su curpa.
Tabata trata di e victima di inicial M. di 17 aña, na e momento ey e victima tabata critico, pero despues el a keda invalido pa motibo di e incidente aki.
E caso aki hunto cu otro cu a sucede na Mandolinstraat dia 12 di maart ultimo ta e casonan di tiramento mas reciente cu a ser registra na Aruba caminda lamentablemente hobennan menor di edad ta envolvi y ta mustra e problematica cu tin pa loke ta trata armanan di candelanan den man di e poblacion mas hoben.
Na Aruba, tin un preocupacion grandi riba loke ta trata posesion y uso di arma candela. Regularmente, ora di atraco ta usa arma candela. Cada aña tin victimanan fatal door di uso di arma candela y cada aña Ministerio Publico ta persigui mas o menos 100 sospechoso pa tin arma candela den nan posesion. Na Aruba ta relativamente facil pa haya un arma di candela.
