Kpa detencion (NW).JPG
Siman pasa dia 28 di november, recherchenan di Cuerpo Policial Aruba a bay over na detencion di un ex-polis, e homber R.E.B.G., di 39 aña di edad biba den Caya Mazurca. Polis ta sospecha nan ex-colega di a comete delitonan cu ta empugna cu nos leynan penal, manera ‘valsheid in geschrifte’, esta falsificacion di documentonan of firma falso riba documentonan of tambe ‘oplichting’, cu ta estafa. E lo a falsifica firma di minister, gobernador y hasta carta di Raad van State di Hulanda.
 
 
G. lo a comete tur e delitonan aki den e periodo di 16 di april te cu 11 di november 2016, pa cual siman pasa dia 28 di november a dicidi di detene y Fiscal Auxilia a opta pa encarcel’e pendiente e investigacion grandi andando awor aki. Un grupo di recherche di Cuerpo Policial ta conduciendo e investigacion aki, hunto cu nan coleganan di e departamento Forensico, bou supervision di Fiscal na Ministerio Publico.
 
E investigacion preliminar ta mustrando cu lo a falsifica documentonan, permisonan y hasta cartanan for di varios instancia y departamentonan di gobierno, manera DOL, DIMAS, Censo Burgerlijke Stand, Uitreksel di Censo, sentencia di Corte, acta Notarial, Sentencia di Raad van State di Hulanda, documentonan di ‘Inmigratie en naturalisatie dienst’ di Ministerie van Veiligheid en Justitie di Hulanda, permiso supuestamente firma pa minister Benny Sevinger, carta di AZV, carta di Directie Financien y SIAD (Impuesto). G. te hasta lo a falsifica cartanan di PriceWaterhouseCoopers, Centrale Bank y Griffier di Corte. Tin hende cu lo a hasta haya paspoort Hulandes.
 
G. su formula lo tabata asina hinca den otro cu un persona ta yega cerca e homber aki pa e regla su permiso di estadia of trabou, pa cual e ta cobra entre 1500 te cu 3000 florin. Na su turno e ta falsifica tur cos, haciendo comosifuera cu el a efectua tur e tramitenan stipula. E cliente ta ricibi documentonan cu stempel y firma riba dje, siendo cu tur ta falsifica.
 
Den gobierno a descubri cu departamentonan no conoce e forma di traha di otro, pues un departamento no ta ripara asina lihe cu e numbernan di e carta di e otro departamento ta falso, of cu e ‘kenmerken’ no ta cuadra. Asina recherchenan a bin topa por ehempel cu un carta falsifica di Censo bisando cu tin problema cu e sistema y ta pidi DIMAS pa sigui cu e proceso en espera di Censo. Tambe e sospechoso lo a traha permiso falso – te cu awor lo a topa cu no menos di 40 ‘provisionele vergunningen’ – , pa un compania cu lo a page 21 mil florin pa e servicio aki. 
 
Ta parce cu e sospechoso aki lo a traha asina profesional den su trabou, cu e tabata cobra stranheronan 4500 florin pa e por procesa y logra haya paspoort Hulandes pa nan. E lo a haci esaki door di ‘bypass’ oficina di gobernador completo, uzando un articulo den Rijkswet di Reino Hulandes. Uzando esaki e lo a falsifica carta di Hulanda pa regla naturalisacion pa e stranheronan.
 
Tanto minister di Infrastructura Benny Sevinger como gobernador di Aruba a entrega un keho penal contra G.. Ta investigando cartanan, documentonan y su forma di anda for di aña 2014 caba. Awor e sospechoso ta tras di tralie, pendiente un investigacion tumando luga na Aruba mes pero tambe na Hulanda. No por keda sin menciona cu G. Ya caba tabata encarcela den pasado pa estafa.