A detene por lo menos 10 sospechoso relaciona cu Tik Tok Challenge

Mediante un comunicado pa prensa di ayera mainta, a informa cu den ultimo luna Cuerpo Policial Aruba ta constata cu tin basta hortamento of intento pa horta autonan specialmente marca KIA modelo Rio. KPA a tuma nota tambe cu malechornan ta purba di horta e KIA modelo Sportage como tambe KIA modelo Picanto purbando e mesun Modus Operandi.

Esaki ta un fenomeno cu a cuminsa na Aruba ora grupo di hobennan a cuminsa haci e “TikTok Challenge”.

Door di usa un USB cable charger di telefon nan ta start e auto en cuestion, e sospechoso ta graba su mes haciendo e acto aki pa despues post e riba TikTok.

Ta asina cu departamento di Team Motorvoertuigen Criminaliteit (TMC ) kier concientisa esnan cu tin e auto menciona pa pone mas atencion y precaucion pa evita cu e auto por ser horta. Doñonan di e autonan por preveni door di pone alarma of tambe stuurklem.

Te cu ayera e team a detene por lo menos 10 sospechoso relaciona cu e casonan di joyriding di autonan Kia modelo Rio, e edad di personanan deteni ta cuminsa for di 14 aña pa 21 aña.

Polis tin atencion pa cu e fenomeno aki y ta avisa pa tur persona cu tin pensa di haci esaki, cu e chens ta grandi di ser gara y deteni como consecuencia cu e persona ta bay cera. Mester corda cu esaki ta un delito y tin castigo riba dje .

Mayornan di e sospechosonan menor di edad tambe mester corda cu nan ta por wordo poni responsabel pa e gastonan di e daño haci na e auto como tambe daño na tercero.

Mayornan papia cu boso yiunan y splica nan e consecuencia cu e “ Tik tok challenge” tin. No ta solamente e yiunan ta bay cera pero boso como mayor ta wordo poni responsabel pa tur gasto envolvi.

Manera Bon Dia Aruba a publica den su edicion di 5 di januari ultimo, medionan di comunicacion a bin reportando diferente suceso cu ta involucra hobennan y autonan di un marca specifico “KIA.”

Investigando riba internet, den e website di noticianan EFE a sali publica cu esaki ta forma parti di un supuesto challenge cu tin algun tempo caba riba e red social Tik Tok cu ta yama “Kia Boyz Challenge” na unda cu for di october 2023 ciudad di Chicago a presenta un demanda contra e marcanan Hyundai y KIA acusando nan di exagera e medidanan anti robo, a pesar cu nan no tabata conta cu sistema avansa di siguridad, loke a provoca un epidemia di hortamento na e ciudad, cu a bira pio debi na challenge riba Tik Tok.

E personanan cu tabata comete e robonan aki, ta denomina como “KIA Boyz” y nan a haci e fayo di siguridad aki viral como parti di un challenge, yama “KIA Challenge.”