Polis ta investigando casonan di portacion ilegal di arma di candela cu hopi prioridad. A base diario ta teniendo control cu ta produciendo detencionnan, pero tambe ta kitando arma for di riba caya.
Relaciona cu un caso recientemente, unda a haya un arma di candela ilegal den cas di un comerciante, awe mainta a detene un sospechoso mas. Ta trata aki di e homber di inicial D.F., cu a keda deteni na su cas, como sospechoso di lo a viola e ley di “vuurwapenverordering”. Mas informacion no por suministra na e momentonan aki, pero tampoco por descarta cu lo tin mas detencion den e caso aki.
E “Vuurwapenverordering” di Aruba ta data dor di 29 december 1998 pero cu a conoce adaptacion dia 21 october 2013. E ta contene 16 articulo cu ta regula ken por carga arma, ki ora, ken ta duna permiso pa haci esey, kico ta e condicionnan mara na e permiso, ta determina castigo pa esun cu tin un arma di candela den su poder sin e permiso necesario, etc. Generalmente tin un castigo di 4 aña di prizon cu por yega te na 6 aña di prizon pa esun cu tin un arma di candela den su poder, sin cu e tin e permiso pa esey.
Fuente comunicado KPA
