Dialuna 15 di januari ultimo a bira conoci e noticia di cu un dama a ser atraca y hinca cu cuchiu ultimo den area di Eagle Beach, pa e caso aki ayera Cuerpo di Polis a informa cu 2 persona a ser deteni.
Diaranson den oranan di madruga e Atraco Team (TBP) hunto cu team di Aresto a haci un entrada hudicial na Amandelstraat.
Esaki ta relaciona cu e caso di atraco riba un dama cu tabata canando banda di Eagle Beach y na unda dado momento e lo wordo atraca y hinca. Den e accion di ayera madruga tambe tabata presente K-9 Unit y Flex Team unda a detene dos sospechoso den e caso aki.
E sospechosonan nan ta di inicial S.C.T. naci na Aruba y M.F.L.S. naci na Colombia, Cuerpo di Polis di Aruba no ta descarta cu lo por tin mas detencion den e dianan nos dilanti.
Dialuna 15 di januari den oranan di anochi pa mas o menos 11:58pm central di polis a haya e notificacion cu un señora lo a ser atraca y hinca na altura di Paradise Beach Villas, nan a despacha patruya na e sitio y como tambe ambulance.
Ora patruya a yega na e sitio ta topa cu e victima na unda e ta declara cu e tabata train (core) y na un dado momento un homber lo a acerc’e cu un cuchiu y a atrac’e, den esey, el a purba bringa cu e atracado y na un dado momento e atracado lo a hinc’e. E sospechoso tabata bisti full na preto segun a informa, despues e lo a core bay direccion noord y probablemente a huy den un auto color shinishi.
E atracado a logra bay cu su celular, ora ambulance a yega na e sitio a duna e victima asistencia medico y despues a transport’e pa hospital.
Atraco Team a presenta na e sitio como tambe polis tecnico y na unda a sigui cu e investigacion. Departamento di slachtofferhulp tambe a presenta pa asisti e victima.
Riba medionan social por a mira diferente reaccion di usuarionan indicando cu “Aruba no ta e mesun Aruba di antes pa bay core den oranan laat di anochi y tampoco su so.” Un usuario a skirbi dunando su opinion riba e sucedido aki.
