Ayera, marketing di Serlimar a manda un comunicado pa prensa informando cu hunta directivo di e compania a tuma decision di termina e relacion contractual cu e actual director, Hensley Davelaar.

Maske e compania a nenga di duna detaye di e motibonan cu a conduci na e decision drastico di e hunta directivo, nan ta señala cu e intencion ta pa ‘sanea e situacion lo mas pronto posibel’.

Recientemente e compania ta enfrentando retonan financiero y den su maneho, cu hopi cuestionamiento y polemica rond di Serlimar. Bon Dia Aruba a publica varios articulo den lunanan di december y januari ultimo, cu ta ilustra e problemanan cu e compania ta enfrentando.

 

Por ehempel, dia 16 di december ultimo, nos a publica e articulo ‘Serlimar ta haya extra fondo pa paga salario’, den cual nos a relata cu gobierno, a traves di ministro encarga cu Finanzas, a manda un notificacion pa parlamento unda ta indica cu e situacion financiero di Serlimar ta rekeri un inyeccion extra di Afl. 800.000 pa 2019, cual a añadi na e presupuesto complementario 2019 den forma di un ‘Nota van Wijziging’. Segun varios observador e fondonan extra a bira necesario pasobra e cambio di ley di Serlimar no a logra aprobacion den parlamento, cu consecuencia cu e aumento planea di entrada di Serlimar no por a tuma lugar. Na fin di september ainda tabatin nota un deficit anticipa di Serlimar di Afl. 5.078.800 loke a resulta insuficiente.  Segun nos a comprende e extra placa aki tabata pa paga salario, loke semper ta algo di prioridad.

Sin embargo, mientras tanto a cay den nos letterbox digital algun copia di documento di e compania, cu ta duna un resumen di e gastonan di mercadeo di Serlimar. Nos no sa si e documento ta refleha tur gasto haci cu promocion den medio di comunicacion. Di tur manera, nos por saca e conclusion cu e gastonan total mensual ta yega na algo mas di Afl. 21.000, cu ta acumula na gasto anual di e resumen aki di poco mas di Afl. 250.000, segun nos a publica den e articulo titulo ‘Serlimar ta dedica hopi recurso na mercadeo’, dia 21 di december ultimo.

Ademas, den un articulo dia 18 di januari ultimo, nos a publica comentarionan di Davelaar mes, den cual el a declara cu no a haya reaccion espera pa tarifa residencial, cu comunidad no ta cumpli cu su responsabilidad. Alabes a declara cu pa motibo di campaña contra e compania y contra e ley di Serlimar, e porcentahe di esunnan cu a paga tabata apenas 20%, cual ta e motibo cu e compania no por a cumpli cu su pagonan.

Director financiero di e compania, Marelva Wever, di su banda a declara cu maneho di Ser’i Teishi, cu ya caba ta controversial cerca comunidad, ta un costo sumamente grandi pa e compania, ya cu mester a pasa e desperdicio pa e compania Ecogas. Esaki a keda publica pa Bon Dia Aruba dia 20 di januari ultimo.

Esakinan ta duna un bista di e situacion mas recien di e compania, e retonan financiero y den maneho cu por tabatin un efecto riba e decision di hunta directivo. E comunicado di Serlimar ta bisa den su totalidad: “En conexion cu desaroyonan na Serlimar, Raad van Toezicht a dicidi di termina e relacion contractual cu e actual director. Mirando cu ta un contracto entre dos partido priva, no kier drenta den e detayes di e motibonan cu a conduci na e terminacion aki. Raad van Toezicht y Gobierno mester vela pa interes di e compania, cual ta rekeri pa un otro persona tuma e mando di e empresa cu e tarea pa sanea e situacion lo mas pronto posibel.”