A descubri un vacuna pa UTI cu por stop infeccion pa nuebe aña

(Independent)—Por preveni infeccion den tracto urinario—conoci como UTI of urineweginfectie—pa nuebe aña cu un vacuna di flit oral, un “logro” cu prueba Britanico a descubri.

Mita di tur hende muhe na mundo y un den cinco hende homber ta experencia e infeccion bacterial doloroso, y por esaki por ta particularmente peligroso pa hendenan grandi. Sintomanan ta inclui un kimamento durante orina of un necesidad pa bay baño mas frecuente cu normal.

Infeccionnan recurente por desaroya den 20 pa 30% di caso y ta rekeri antibiotica di plaso corto. Sinembargo, e medicinanan aki por bira menos efectivo mientras cu e infeccion, cu cada bes ta bira mas resiste, ta aumenta.

Den un prueba conduci pa cliniconan na e Royal Berkshire Hospital den Reino Uni, 89 pashent a usa e vacuna di flit bao di nan lenga tur dia pa tres luna, y despues a sigui cu e desaroyo di e pashentnan pa nuebe aña.

Den ambos hende homber y hende muhe cu UTI recurente, mas cu mita (54%) a keda sin e infeccion pa nuebe aña despues di a vacuna, cu ningun efecto reporta. Dr. Bob Yang, urologo consehero pa e Royal Berkshire NHS Foundation Trust, ken a co-lidera e investigacion, a bisa: Prome cu nan a haya e vacuna, tur di nos pashent tabata sufri for di UTI recurente, y pa hopi hende muhe, esaki por ta dificil pa trata.

“Nuebe aña despues cu nan a haya e prome vacuna, casi mita di e participantenan a keda sin infeccion. “En general, en vacuna aki ta safe den plaso largo y nos participantenan reporta menos infeccion cu tabata menos severo. Hopi di nan cu a haya un UTI a conta nos cu simplemente bebiendo hopi awa tabata suficiente pa trat’e.”

E vacuna a ser desaroya pa compania farmaceutico basa na Spaña, Immunotek. E MV140 ta contene cuatro especie bacterial den un suspension di awa. E ta disponible den 26 pais. E investigacion a ser presenta e weekend cu a pasa na e European Association of Urology (EAU) Congress na Paris.

Ta anticipa cu e resultadonan nobo lo ser pasa pa e Medicines and Healthcare Products Regulatory Agency (MHRA) prome cu e vacuna por ser aproba pa uso riba NHS. Gernot Bonkat, presidente di EAU Guidelines on Urological Infections, a bisa: “E descubrimentonan aki ta mustra positivo. UTI recurente ta un strobacion economico y e uso exceso di antibiotica por resulta den infeccionnan cu ta resistente na antibiotica.”