(AFP) – Un organisacion criminal cu a gaña casi 50 hende muhe Colombiano pa hiba nan na Spaña y obliga nan eherce prostitucion a keda descubri den un operacion conhunto na nivel policial y hudicial entre ambos pais, Guardia Civil Spaño a informa ayera diabierna.
E personanan responsabel tabata probecha e situacion di vulnerabilidad di e muhenan aki na Colombia pa atrae nan, “por a probecha mas di 50 victima den ultimo cuater aña,” Guardia Civil a bisa den un comunicado.
“E victimanan, un bes cu tabata haya promesanan di futuro, tabata transporta na diferente provincia Spaño cu e proposito unico di eherce prostitucion na apartamentonan priva,” entre 25.000 pa 30.000 euro (entre 27.200 y 38.100 dollar) tabata e beneficio cu e organisacion por tabata haya cu cada un di nan.
E muhenan tabata obliga na realisa pagonan mensual na e organisacion, cu den caso contrario tabata menasa nan y nan famia, incluso a yega te punto di comete sicariato.
E operacion, cu a cuminsa pa via di un denuncia di un victima cu a bira un testigo protegi, a hiba e detencion di shete persona, cuatro di nan di Spaña “na e cual ta imputa e delitonan di trata di persona cu fin di explotacion sexual, labamento di placa y pertenencia na un organisacion criminal,” Guardia Civil a bisa.
Otro a keda aresta na Colombia, entre nan esun cu tabata considera como e lider di e organisacion, ken tabata controla e proceso di captacion, traslado y explotacion di victimanan, el a keda deteni na Medellin.
E operacion tabata den man di e prome Ekipo Conhunto di investigacion entre Spaña y Colombia na nivel hudicial y policial -cu participacion di Guardia Civil Spaño, Polis Nacional di Colombia y ambos Ministerio Publico- loke a permiti hiba varios victima y famianan leu for di e organisacion “na un luga sigur”, segun e nota a indica.
