(NLTimes)—E sangura Asiatico (conoci tambe como sanger tiger) ta plamando den Hulanda. Te awo e aña aki, a mira nan den 12 luga den e pais, incluyendo cuatro bario residencial, y temporada di sangura ta leu di caba. Aña pasa tabatin ocho bista di sangura tiger, cuatro na 2021 y dos na 2020, segun NOS ta reporta.
E sangura tiger ta mas chikito cu e sanguranan di Hulanda. E por ser reconoci na su strepi blanco patras y su pianan blanco. E insecto aki ta origina for di Sudeste di Asia pero a establece su mes den paisnan Sur Europeo manera Spaña y Francia.
Den paisnan unda e sangura tiger ta comun, nan por transmiti malesanan contagioso manera dengue. E riesgo di esaki ainda no ta adresa suficientemente na Hulanda mirando con tiki bestia tin eynan, segun Arjan Stroo di e Nederlandse Voedsel- en Warenautoriteit (NVWA) a conta NOS. Pa plama e infeccion, e sangura mester pica un persona infecta y despues un otro persona. P’esey un cantidad grandi di sangura por resulta den un plamamento di e malesa. “P’esey nos no kier e sangura aki, y nos ta purbando di extermin’e,” Stroo a bisa.
E sangura tiger a keda aparece den Hulanda desde 2005. NVWA ta kere cu mayoria ta drenta e pais den vehiculonan di biaheronan of den trucknan di carga. NVWA ta tuma medidanan controlante pa haya descubrimento di e sangura. Den e barionan unda a mira e insecto, residente a haya un carta puntrando nan pa busca luganan unda e sangura por cria y pa kita esakinan. Sangura tiger ta preferi luganan unda tin awa para, manera hemchi, pochi di flor of bari di awa. Si haya webo, NVWA ta kita nan of ta trata e sitio pa asina e webonan no por sobrevivi.
E sangura lo eventualmente tuma su residencia na Hulanda, pero por retrasa e tempo ey por medio di tuma medida, segun NVWA a bisa. E institucion a yama na biaheronan pa controla bon nan autonan pa sangura prome cu nan core bay cas.
