Ayera mainta a tuma luga e sentencia di un caso cu a trata tres siman pasa, tocante abuso sexual contra un cliente di abogado Peter Mohamed, ken a sigura cu na e momento ey, fiscal a exigi e castigo di cinco aña y mey.

Ayera diabierna e decision a cay pa e persona aki cu tabata acusa di supuestamente di a comete abuso sexual contra su hijastro durante un periodo di aproximadamente cinco aña.

 

Den sentencia aki, manera Mohamed a sigura, e hues despues di e tratamento den un siman a dicidi di laga su cliente bay pa motibo cu no tabatin suficiente base pa e persona aki, cu tabatin seis luna cera, por a sigui keda deteni. “Awe nos a haya oficialmente e sentencia di hues unda el a declara mi cliente liber di tur cargo, a base cu e ta haya cu no tin suficiente evidencia of pruebanan den e caso pa por conden’e”, el a bisa.

Fiscal di Ministerio Publico tin dos siman pa apela e decision aki si no ta di acuerdo cu esaki. Manera a sigura caba e persona aki tabata cera den KIA caba y na final di aña pasa el a haya su libertad, “pero esaki tin su efectonan.”

Mohamed a señala cu e hues a haci algo “hopi bon” na unda cu den e sentencia el a pone un extra enfasis riba e hecho cu el a declara su cliente liber debi cu no tabatin suficiente evidencia y cu e decision aki no tabata na base di ken e tabata kere, sino cu no tabatin suficiente prueba.

“No tabata pa laga e victima sinti su mes comosifuera cu e no ta wordo scucha, pero hues a laga sa bon cla cu e hecho cu e ta laga mi cliente bay no kiermen cu e no ta kere den su declaracion,” el a sigura.

Ademas, Mohamed a comenta cu hopi di casonan asina ta pasa entre e persona cu ta un denunciante y e “perpetrador” esun cu ta comete e actonan, pero no tin ni un testigo presente cu por bisa “m’a wak e cos ey pasa.” Ley ta bisa specificamente cu no por condena un persona pa actonan castigabel si tin solamente un testigo, locual a pasa den caso aki na unda tampoco tabatin prueba extra cu por a substancia e denuncia. “E ora ey un hues ta obliga eigenlijk declara un persona liber y esey ta e base dicon el a laga mi cliente bay.”

Antes manera Mohamed a sigura, tabatin e problema cu hendenan tabata bay cera cu un declaracion na unda si hues tabata kere e persona e acusado tabata condena. “Esey tambe tabata un situacion hopi peligroso cu bo ta bay cera, pasobra djis un hende e a declara algo contra bo y e kier cera bo.”

Mohamed a finalisa bisando cu hopi biaha abuso sexual ta tuma luga ora niun hende tin testigo y cu esaki ta un di e tipo di casonan cu ta hopi dificil pa prueba y dificil pa defende tambe.