A cuminsa renobacion na Ayo Rock Formation

Ayera mainta DOW conhuntamente cu miembronan di Gobierno di Aruba a ofrece un conferencia di prensa pa medionan local na Ayo Rock Formation pa informa comunidad tocante e renobacion cu nan a cuminsa haci for di ayera den e luga aki.

Prome minister demisionario Evelyn Wever-Croes a splica cu aña pasa ora Aruba a sali di e prome ola di pandemia Covid-19, nan a tuma e decision di concentra riba un proyecto cu nan a yama Aruba’s Outdoor Amenity Economy cu ta trata di actividadnan economico, creativo, recreativo y nobo rond di e patrimonionan natural cu Aruba tin como patrimonionan social y monumental.

Igualmente, el a indica cu nan a lanta un comision cu representantenan di varios ministerio e cual a haya e tarea di presenta ideanan y proposicionnan pa wak con por duna bida na e luganan aki.

E proyecto lo wordo desaroya den areanan di pafo, mirando cu awendia ta mas recomendabel y mas saludabel tambe pa hende local y pa bishitante, segun loke Wever-Croes a menciona.

Ayo Rock Formation ta un di e proyectonan cu ta conoci pa ta un tesoro di naturalesa pero specialmente uno geologico y historico cu ta duna oportunidad pa recrea y conoce historia di Aruba, di e tribu indigena cu a biba den teritorio aki antes y a haci uso di e patrimonio natural geologico di Ayo.

Aworaki ta cuminsa cu e prome fase di e proyecto di renobacion cu ta encera e renobacion di e cura di transhi cu ta full rond di e luga aki, tambe renobacion di e cabañanan pa bishitante na parti di dilanti y e facilidadnan sanitario (baño), e di dos renobacion cu lo bin despues ta bay haci e entrada mas atractivo y lo wordo renoba y lo crea mas luga di parkeo, tambe e caminda pa cana y drenta cu no semper ta sigur lo wordo drecha y prepara pa rolstoel lo por drenta.

Ministerio di Turismo y ATA lo traha riba e panelnan di informacion nobo pa asina por splica na cada un di e luga di e parke kico ta nifica, den e di dos fase tambe lo cuminsa cu e construccion di un galeria di arte y souvenir, cu segun Wever-Croes a bisa esaki ta e di dos meta importante di e proyecto aki cu lo bira un showcase pa e artesanonan y artistanan local por bende nan obra di mannan, souvenir pero tambe musica.

“E idea ta pa asina cada un dia e artista y artesano local por haya un oportunidad husto pa por promove su producto y por bendel’e tambe”, el a expresa.

Ministerio di Cultura ta encarga di sesionnan informativo pa motiva e artesanonan y tur otro hende cu ta interesa den e carera creativo, na unda hopi tipo di souvenir por wordo traha na Aruba.

E di tres fase ta trata cu nan lo converti e parke den un hardin botanico cu matanan y especienan original cu ta crece na Aruba, “Ayo Rock Formation no ta solamente un area historico pero tambe botanico y asina nos por duna realce tambe na e cuebanan di petroglifo cu tin akinan na Ayo”, Wever-Croes a informa.

E parke aki lo bira un atraccion tambe pa muchanan local na unda nan por bay siña, cu esaki tambe tin e meta pa nan expande y establece e industria artistico na Aruba, pa motibo cu turistanan awendia cu ta bin nan kier cumpra algo netamente di Aruba na unda artistanan lo expone nan producto.

“Nos tin hopi potencial artistico na Aruba y cu e proyecto aki nos ta espera di por duna na cada un di artesano y artista local e oportunidad pa nan por trece nan productonan pa dilanti”, el a declara.

Pancho Geerman director interino di Museo Arkeologico Nacional Aruba (MANA) a splica cu e sitio aki ta un atraccion cultural y natural di Aruba situa den un paisahe cu barancanan grandi y pa e indigenanan e tabata un luga sagrado, na unda tabatin un papel hopi importante den nan creencia. Personanan specifico den comunidad como curandero tabata practica nan ceremonianan den e luga aki cu nan tabata haya contacto cu otro mundo y nan tabata pone e mensahenan ey den e barancanan aki.

E mensahe a keda y tin algun di nan cu ta pinta den colo cora y blanco, algun cu formanan geometrico y otro nan cu tin forma di caracteristica humano, e sitio aki ta un di e 32 luga cu tin pintura riba piedra y e ta un di e 6 sitio cu por haya pinturanan den colo blanco, cu ta masha poco usa.

Ta conoci for di investigacion cu tabatin tres baranca cu pintura cu ta visibel, awor tin dos so y otro cu pa via di tempo e verf ta disparce, manera Geerman a indica.

E baranca mas importante tin por lo menos 27 pintura, pero tambe ta importante e fechamento di pinturanan, te aworaki tin fechamento di solamente di un pintura, fechamento ta un tecnica di radio carbon y na Aruba no por wordo haci’e, pa fech’e cada pintura ta costa aproximadamente di 300 pa 400 euro, segun loke Geerman a informa.

E fechamento cu nan tin ta indica cu e pinturanan aki ta di mas o menos entre 1.000 cu 750 aña pasa, tambe segun indicacionnan cu nan tin nan ta cuadra cu e etapa di dos migracion na Aruba, esey ta di indigena Caquetio pero e prome personanan ya caba a yega Aruba mas o menos 1.500 AC.

Igualmente, Geerman a afirma cu Spaans Lagoen ta probablemente unda cu e prome habitantenan a yega Aruba, “p’esey nos mester realisa ki importancia e tin pa nos pais”, el a comenta.

Tambe el a bisa cu realmente nan no sa kico e pinturanan ey ta nifica, sinembargo, nan si por bisa cu e sitio aki ta sagrado y e ta inspira hopi persona.

Pa finalisa, a wordo treci dilanti cu tur e trabounan aki ta cay bou Aruba’s Outdoor Amenity Economy conhuntamente cu DOW cu lo dura aproximadamente seis luna na unda segun nan a sigura e trabounan lo wordo haci cautelosamente teniendo na cuenta e naturalesa.