Den presencia di Prome Minister Evelyn Wever-Croes y demas ministernan y parlamentarionan, ayera mainta minister di Asuntonan di Adulto Mayor Ursell Arends a duna comienso na e prome Foro Nacional presentando e Plan Delta y poniendo enfasis riba e compromiso colectivo pa bienestar di adulto mayor.

Minister Arends a cuminsa dunando su discurso papiando cu e ta imagina un Aruba unda individuonan di 60 aña of mas por biba un bida saludabel, participativo y digno. Indicadornan clave di bienestar ta inclui autonomia, mobilidad y cuido adecua, reconociendo e impacto significante di embehecimento riba condicionnan socioeconomico.

Reconociendo e retonan presenta den embehecimento, minister a pone enfasis riba e necesidad pa un evaluacion critico di strategianan, pa balansa y sostene e gastonan creciente relata na cuido door di embehecimento. Investigacionnan tocante eficiencia den facilidadnan di cuido y evaluacion di e sistema di subsidio actual ta na caminda.

Adicional na esaki, e maneho ta enfoca riba crea servicionan adapta y accesibel pa e adulto mayor pa e crecemento drastico den e grupo demografico aki.

Esfuersonan desde 2021 ta inclui e establecimento di Directie Ouderenzaken, programanan di Centro di Barionan y reforsamento di posicionnan di NGO’s.

Minister a enfatisa e necesidad di un perspectiva colectivo riba embehecimento, cambiando di un enfoke medico pa un enfoke social. E cambio social aki ta rekeri un compromiso nacional, no solamente un responsabilidad di gobierno.

Recientemente, Ministerio di Adulto Mayor a conduci un “Quick Scan” bou di guia di Profesor Anne-Mei The, revelando problemanan preocupante manera lista di espera largo pa facilidadnan di cuido, abuso y negligencia, vulnerabilidad social y persona mayor bibando den pobresa.

“E mensahe ta cla, accion inmediato ta necesario. No tin tempo pa perde y pasonan tin cu ser tuma, nos ta construyendo e brug mientras nos ta crusando. Y pa logra esaki ta exigi un cambio di enfoke y perspectiva,” minister Arends a señala.

Durante e Foro Nacional pa Adulto Mayor ta bay trata diferente tema importante, manera tendencianan demografico, vivienda, servicionan di bienestar y cuido como tambe participacion civico. Den cuadro di esaki a invita un variedad di representante gubernamental como tambe no gubernamental pa forma un dialogo informativo y constructivo.

Delta Plan 2023-2023
 Delta Plan mester ta un instrumento di forma colectivo pa por traha desde un enfoke diferente segun plan di strategia na con por mehora e calidad di bida di adultonan mayor, e Delta Plan ta trata cu adulto mayor ta un di e gruponan mas vulnerabel den comunidad y manera minister Arends a menciona den e foro “ta ora pa interveni y pa e motibo aki a desaroya e Delta Plan 2023-2033 como parti di e vision y e prioridad di maneho, e Delta Plan ta fungi como un master plan pa fiha e pasonan pa e siguiente 10 aña, e ta crea pa alinia gruponan di interes y hancra compromiso cu adultonan mayor, e ta un documento cu lo por y lo ser adapta unda ta necesario,” el a bisa.

E metanan pa e periodo di dies aña aki ta pa transforma e sistema di cuido y enbehecimento medicalisa y fiha un rumbo pa enbehecimento den un forma di enfoke social, teniendo na cuenta cu e necesidadnan di e persona en bes di tuma e bista di “one size fits all” of enfocando riba e malesa en bes di e ser humano, implementacion y principionan di cuido corecto na e luga corecto, fortifica sosten social pa keda mas largo posibel den hogar propio lo cual ta e mision.

Pa por logra esaki mester tuma accionnan concreto y esey ta encera ma mantene un bista claro den e vision y pone e bienestar di adulto mayor prome.

“Nos mester busca solucionnan flexibel y creativo pa pone esaki den practica y mas cu tur cos, conduci investigacionnan pa desaroya y evalua e Delta Plan.” Minister Arends a splica

CBS su cifranan ta hopi importante pa e foro aki
 Desiree Helder director di Central Bureau of Statistics Aruba (CBS) a expresa y e ultimo cifranan di Censo ta mustra cu tin un crecemento basta grandi den e cantidad di adultonan mayor y esey ta sigui crece “nos a publica nos proyeccionnan di e poblacion te cu 2040 y nos ta wak cu ta berdad cu tin un crecemento basta grandi den cantidad di hendenan cu ta di 60 aña bay ariba, esey ta nifica cu nos poblacion ta enbeheciendo cada biaha mas lihe y mester tuma atencion riba e parti ey.”

Helder a sigura cu adultonan mayor mientras mas grandi nan ta bira mas problemanan nan tin cu nan salud y tambe nan ta haya mas limitacion, pero esey no necesariamente ta cuminsa den edad halto sino tambe den edad mas hoben ora cu tin problemanan di presion halto, diabetes y otro malesanan. Den edadnan mas halto ta haya e limitacion a causa di e problemanan di salud.

E cifranan di CBS ta pa informa den e foro aki di kico ta e realidad di e poblacion, kico ta spera pa e futuro, pa esnan cu ta encarga cu maneho haci un maneho debido y tambe pa enfoca riba con nan lo kier desea pa Aruba pa e siguiente añanan cu ta bin.