WILLEMSTAD – Diabierna ultimo a cuminsa bende productonan local na Sha Caprileskade, esaki ta loke cu director empresarial di MEO a duna di conoce.
Esaki ta sosode despues cu e cinco ultimo barconan di fruta Venezolano cu tabata para na Sha Caprileskade a bandona Corsou, y no por regresa, debi cu frontera cu Venezuela ta cera.
Dia 30 di april y 1 di mei, e barconan Venezolano a bandona Corsou. Esaki ta pa motibo cu fechanan alargacion di un luna di estadia a termina y nan mester bandona e isla.
Mirando esaki, ya e productornan local ta cla pa para bende fruta, berdura y boca dushi na Sha Caprileskade. Pa loke ta trata cos di boca dushi por cumpra tambe manera pastechi, empana, johnnycake etc.
Olaria-Maduro a splica cu ta trata aki di un proyecto piloto di 3 luna, y lo evalua e acogida cu e productornan local a haya na Sha Caprileskade. Hopi productor ta hopi entusiasma pa para na e sitio y bende nan producto. Esaki ta segun e fuente Extra.
Mester bisa cu e otro parti di Sha Caprileskade ainda falta pa drecha y ta stanca pa motibo di financia. Si e barconan di fruta regresa, nan por para na e sitio aki tambe.
Pues ta interesante pa mira si hendenan ta sostene nos mes hendenan local, pasobra esey tabata e grito na momento cu aña pasa e problema di ceramento di frontera a start, y cu barconan Venezolano mester a bandona Corsou. Tabatin un dialogo organisa pa MEO, caminda a sali afo cu pueblo ke pa e barconan di fruta keda para na Sha Caprileskade, pero den combinacion cu productornan local. Awor e momento a yega pa productornan local, y nan mester ta consistente pa para na sitio bende nan productonan.
